Me uniformë drejtë Sirisë

Gramoz Shabanit i ka munguar vetëm arma me të cilën do të luftonte në Siri kur është kapur në aeroportin “Adem Jashari” në Prishtinë, të mërkurën. I riu me prejardhje nga Millosheva dhe me shtetësi belge është arrestuar nga Policia e Kosovës për shkak të dyshimit se ishte nisur për t’u bërë pjesë e organizatave terroriste në Siri, shkruan sot Koha Ditore.

Ai me vete kishte uniformë ushtarake, batanije të posaçme për kushte lufte, si dhe dylbi, ka mësuar “Koha Ditore”. Ai e ka pranuar se ishte nisur për në Siri.

Zëdhënësja e Prokurorisë Speciale të Kosovës, Liridonë Kozmaqi, ka konfirmuar se gjatë ditës së mërkurë, në aeroportin ndërkombëtar “Adem Jashari”, me urdhër të prokurorit nga Prokuroria Speciale e Republikës së Kosovës, një person i dyshuar me inicialet G. Sh. është ndaluar dhe arrestuar.

Ngjashëm si Gramozi kishin vepruar edhe dy të rinj të tjerë nga Ferizaj, të arrestuar në Aeroportin e Prishtinës, kundër të cilëve është ngritur aktakuzë për terrorizëm në tentativë.