Me shfaqjen Gënjeshtra -”Le Mensonge” në Teatrin e Qytetit, përmbyllet edicioni i 26-të i “Javës së Frankofonisë”

Është mbyllur edicioni i 26-të i “Javës së Frankofonisë”, në Gjilan me shfaqjen Gënjeshtra -”Le Mensonge” në Teatrin e Qytetit, me këtë rast, kryetari i Komunës, Alban Hyseni tha se Gjilani sivjet ishte “Kryeqytet i Frankofonisë”, ku dëshmoi se është një qendër e hapur, moderne dhe e gatshme për bashkëpunime të mëdha.

I pari i Gjilanit shtoi se në kuadër të “Javës së Frankofonisë”, Gjilani mirëpriti shfaqjen “Le Mensonge” (Gënjeshtra) të autorit francez, Florian Zeller. Nën regjinë e Ekrem Sopit dhe se Trupa e Teatrit nga Gjilani dhuroi një performancë të shkëlqyer, duke bashkuar artin skenik vendor me dramaturgjinë bashkëkohore franceze.

“Kjo javë ka qenë një festë e vërtetë e kulturës dhe diversitetit në qytetin tonë. Përmes filmit, muzikës dhe teatrit, Gjilani dëshmoi edhe një herë se është një qendër e hapur ndaj vlerave evropiane dhe bashkëpunimit ndërkombëtar”, tha kryetari Hyseni.

Ai falënderoi të gjithë artistët dhe qytetarët që e bënë këtë edicion të 26-të të paharrueshëm. /2LOINLINE/