Me nderime ushtarake u varros zyrtari i lartë i FSK-së, Ali Ngucati

Me nderime të larta ushtarake u varros sot zyrtari i lartë i Forcës së Sigurisë së Kosovës, Ali Ngucati në fshatin e tij të lindjes në Polac të Skënderajt.

Për të bërë homazhe pranë arkivolit të të ndjerit në shtëpinë e kulturës në Skënderaj, morën pjesë familjarë, miq, shokë, kolegë të FSK-së, veteranë të UÇK-së, si dhe një numër i madh i qytetarëve të Republikës së Kosovës, për të vazhduar me Akademi Përkujtimore ku u përkujtua angazhimi dhe sakrifica e Aliut në luftën çlirimtare, dhe në ndërtimin e institucioneve të sigurisë pas përfundimit të luftës.

Në emër të Komandantit të FSK-së dhe të gjithë ushtarakëve, fjalën e mori zëvendës komandanti i Forcës së Sigurisë së Kosovës, gjeneral major Enver Cikaqi, i cili pasi shprehu ngushëllimet për familjen, miqtë, shokët dhe bashkëpunëtorët, vlerësoi lart kontributin e çmuar, përkushtimin dhe angazhimin e Ali Ngucatit në shërbim të atdheut, duke theksuar rëndësinë e veprës dhe angazhimit të tij ndër vite, që nga celulat e para të Ushtrisë Çlirimtare të Kosovës e deri në formimin e Ushtrisë së Kosovës.

Në Akademi gjithashtu folën nënkryetari i Komunës së Skënderajt, z.Fadil Nura, nga shoqatat e dala nga lufta e UÇK-së, z.Faik Fazliu, dhe në emër të familjes vajza Alisa Ngucati, të cilët vlerësuan lartë kontributin e Aliut si në luftë po edhe pas luftës në krijimin e institucioneve të sigurisë në vende.

Ali Ngucati ishte ushtar i Ushtrisë Çlirimtare të Kosovës, Brigada 114 e UÇK-së në Zonën Operative të Drenicës, pas transformimit të UÇK-së ka shërbyer në Trupat e Mbrojtjes së Kosovës dhe vdekja e ndau në pozitën civile, zyrtar i lartë në Shtabin e Përgjithshëm të Forcës së Sigurisë së Kosovës.

I ndjeri la pas vetes babanë, bashkëshorten dhe dy fëmijë, një djalë dhe një vajzë, të cilët i rriti dhe i edukoi me dashuri, përkushtim dhe frymë të thellë atdhedashurie, duke ua përcjellë vlerat dhe idealet që e karakterizuan edhe vetë gjatë gjithë jetës së tij. /2LONLINE/