Me nderime të larta është varrosur Rreshteri i parë Nijazi Jetullah Uruqi

Sot nga familjarë, miq, shokë e ushtarak të Forcës së Sigurisë së Kosovës i është dhënë lamtumira e fundit nënoficerit të FSK-së Rreshter i parë Nijazi Uruqi.

Para dite në kazermën ,,New Born” në Gjilan janë bërë homazhe pranë arkivolit nga Komandanti i Brigadës së Mbështetjes Operacionale Gjeneral brigade Naim Haziri, të gjitha njësitë e Forcës së Sigurisë së Kosovës, kolegë, shokë e bashkëluftëtarë.

Më pastaj kortezhi ka vazhduar për në fshatin e lindjes, ku është varrosur me nderime ushtarake, në praninë e një numri të madh të qytetarëve nga e gjithë Kosova, miq e familjarë.

Në fjalën e tij lamtumirëse, ish Komandanti i Zonës Operative të Karadakut Ahmet Isufi çmoi lartë angazhimin e tij në Ushtrinë Çlirimtare të Kosovës duke theksuar se ,,Atëherë kur Atdheu thërriste për t`i dal zot, Nijaziu e la kurbetin dhe erdhi të luftoj me nderë për Atdheun”.

Për herë të fundit nga i ndjeri është ndarë Komandanti i Rexhimentit të Mbrojtjes Civile Kolonel Shaip Haziri cili në fjalën e tij theksoi ,,Nuk ka ushtarak në Rexhimentin ku unë komandoj, që nuk e ka dashur dhe respektuar Nijaziun. Ka qenë shembull i një ushtaraku të zellshëm e me plotë motiv për punë. Me mençurinë dhe sinqeritetin e tij ai bëri për vetë kë do që ka pas rastin ta njoh. Ndihemi krenarë që bashkërisht ndërtuam themelet e sigurta të ushtrisë së Kosovës për të cilën Nijaziu punoi pa reshtur gjithë jetën”.

Në fund të ceremonisë u vendosën kurora të shumta lulesh nga shok, miq, bashkëluftëtarë, koleg, ushtarak e shokë nga të gjitha viset shqiptare.