Me moton “Ekzamino, vepro, shpëto” u shënua dita e luftimit të kancerit të gjirit

(2L ONLINE) – Organizuar nga Drejtoria për Kulturë, Rini e Sport, grupi i grave dhe OJQ “Legjenda”, është shënuar sot dita kundër kancerit të gjirit, e cila u mbajt në kuadër të muajit tetor, që konsiderohet muaji ndërkombëtar kundër kancerit të gjirit. Me rastin e kësaj dite dhe sensibilizimin e opinionit për parandalimin e kësaj sëmundje, është organizuar një ecje e përbashkët nëpër qendër të qytetit të Vitisë me moton ; “Ekzamino, vepro, shpëto.

Doktoresha Vjollca Kadolli Halili, tha para të pranishmëve se kjo fushatë vetëdijësuese kundër kancerit të gjirit, mbahet për herë të parë në komunën e Vitisë, ndërkohë ka kërkuar që të fillohet të punohet me seriozitet në këtë drejtim në mënyrë që të luftohet sëmundjet.

“Muaji tetor është zgjedhur si muaji I luftës kundër kancerit të gjirit, një sëmundje e rëndë e cila prek çdo 8 gra në botë. Kjo tregon se sa duhet të jemi të vëmendshëm dhe ta marrim seriozisht në si shoqëri jo vetëm luftimin e kësaj sëmundje, por konkretisht të merremi me parandalimin e saj, sepse me parandalimin e hershëm edhe shpëtojmë jetë”, ka thënë doktoresha Kadolli.

Në emër të institucioneve komunale foli drejtoresha e Kulturës Kaltrina Sylejmani e cila u fokusua në rëndësinë e fushatës dhe vetëdijesimin qytetar ndaj kësaj sëmundje.

Të pranishmëve ju drejtuan edhe dr.Gjylsime Qamili, Mirlinda Sadiku këshilltare e asamblesë komunale dhe Abide Osmani nga shoqata e femrave “Legjenda”. Në mbështetje të Spitalit special “Fati Im” në Prishtinë, gjatë muajit nëntor do të ekzaminohen 10-15 gra nga komuna e Vitisë, që kanë kushte të vështira ekonomike./2L ONLINE/