Me iniciativën e Komunës së Gjilanit, donatorët ndihmojnë disa familje skamnore

(2L ONLINE) – Me iniciativën e Komunës së Gjilanit dhe në bashkëpunim me njerëzit e vullnetit të mirë, janë ndihmuar sot disa familje skamnore, të cilat vuajnë nga gjërat elementare për jetë.

Të martën kryesuesja e Kuvendit Komunal Valentina Bunjaku Rexhepi, e shoqëruar nga Anvi Hamiti – përfaqësues i qumështores “Kabi” dhe zyrtarët komunal, ia kanë konfirmuar sot familjes Sahiti donacionin për qumësht për vitin 2015, sikurse edhe u është siguruar buka dhe pajisje higjienike për këtë vit.

Bunjaku Rexhepi, poashtu ka vizituar vëllezërit Harjullah dhe Hajdar Fetinci, të cilët disa donatorë të tjerë i kanë ndihmuar me të holla për ta përballuar sa më lehtë jetesën në kohë dimri.

Duke falënderuar donatorët, kryesuesja Valentina Bunjaku Rexhepi është shprehur se prioritet i kryetarit edhe këtë vit është që ndihmohen familjet në nevojë, duke filluar nga ndërtimi i shtëpive, meremetimi, pagesa e qirasë, sigurimi i ushqimit etj.

Ndryshe, kryesuesja Bunjaku Rexhepi më 9 dhjetor të vitit 2014 ka vizituar familjen Sahiti, e cila ka katër persona me nevoja të veçanta dhe i ka premtuar kujdes me të gjitha kapacitetet komunale. Për më pak se një muaj, kjo tashmë u bë realitet. /2L ONLINE/