Me donacion të shoqatës Kosova-Shkup, në Gjilan kryhet synetia për 35 fëmijë
/2L ONLINE/ – Me donacion të Shoqatës “Kosova–Shkup“ nga Bursa e Turqisë, Qendra Kryesore e Mjekësisë Familjare në Bashkëpunim me Bashkësinë Islame në Gjilan, kanë kryer sot cirkumcizionin (synetinë) e 35 fëmijëve, të cilët janë përzgjedhur nga Këshilli i BI-së në Gjilan.
Në ngjarje ka marrë pjesë kryetari i Komunës së Gjilanit, Lutfi Haziri, drejtori i QKMF-së, Fejzulla Berisha, përfaqësuesi i shoqatës kosovaro-turke, Rexhep Gunduz i cili është me prejardhje nga Gjilani, sikurse edhe kryeimami i BI-së në Gjilan, Iljas Mustafa.
Kryetari i Komunës, Lutfi Haziri, e ka falënderuar shoqatën “Kosova–Shkup“ për donacionin e kryerjes së cirkumcizionit për 35 fëmijë gjilanas, familjet e të cilëve janë me gjendje jo të mirë materiale.
Haziri tha se Komuna e Gjilanit do ta vazhdojë bashkëpunimin e mirë me këtë shoqatë dhe me komunën e Yilderim-Bursa edhe në të ardhmen në interes të përbashkët. /2L ONLINE/