Me çmimin “Një jetë në sektor” u nderua Byhrete Bajrami, laborante kryesore në KRU “Hidromorava”

Në Prishtinë, më 3, 4 dhe 5 nëntor 2026, po mbahet Konferenca dhe Ekspozita e 14-të e Përbashkët Ballkanike, e organizuar nga Shoqata e Ujësjellësve dhe Kanalizimit të Kosovës (SHUKOS).

Tema e këtij edicioni, “Uji dhe Mundësi të Barabarta”, vë në pah rëndësinë e zhvillimit të një sektori të ujit teknikisht të avancuar dhe gjithëpërfshirës, duke garantuar qasje të barabartë në shërbimet e ujësjellësit dhe kanalizimit, si dhe mundësi të barabarta për të gjithë punonjësit e sektorit.

Në kuadër të këtij eventi, me çmimin “Një jetë në sektor” u nderua znj. Byhrete Bajrami, laborante kryesore në KRU “Hidromorava” Sh.A. – Gjilan, në shenjë mirënjohjeje për kontributin dhe përkushtimin e saj të jashtëzakonshëm gjatë më shumë se 40 viteve të punës në sektorin e ujit.

KRU “Hidromorava” Sh.A. – Gjilan shpreh urimet dhe mirënjohjen e sinqertë për znj. Byhrete Bajrami, duke i dëshiruar shëndet dhe suksese të mëtejshme.

Kontributi shumëvjeçar është vlerë, ndërsa përkushtimi mbetet shembull për gjeneratat e reja!  /2LONLINE/