Me aktivitete të ndryshme, shënohet Dita e Fëmijëve dhe “Festa e Abetares”

(2L ONLINE) – Me aktivitetet të ndryshme, është shënuar sot në Gjilan 1 qershori, Dita Ndërkombëtare e Fëmijëve dhe “Festa e Abetares”. Fillimisht, nxënësit e shkollës fillore “Abaz Ajeti” në Gjilan i ka pritur në zyrën e tij kryetari i Komunës, Lutfi Haziri, i cili tha se po punohet në vazhdimësi për të gëzuar fëmijët të drejtat e tyre, që janë të precizuara edhe në Konventën Ndërkombëtare për të Drejtat e Fëmijëve.

“Të gjithë fëmijëve të Gjilanit ju uroj 1 qershorin, “Ditën e Fëmijëve” dhe ju them se Komuna e Gjilanit punon vazhdimisht në mënyrë që të drejtat e të gjithë fëmijëve të respektohen. Ju jeni e ardhmja jonë, pasi që nga ju pritet në të ardhmen që dikush të bëhet kryetar komune, dikush mesues, mjek, polic, gjykatës etj. Unë i përgëzoj edhe arsimtarët për punën e madhe që po bëni me nxënësit, për të nxjerrë nesër kuadra cilësore”, ka thënë me këtë rast kryetari Haziri.

Fëmijët e klasës së parë, të cilët mbanin pankarta për respektimin e të drejtat e tyre, interaktuan me kryetarin e Komunës, duke bërë disa pyetje me interes, të cilave me kënaqësi iu përgjigj z. Haziri.

Ndërkohë, me recitime, këngë dhe valle, sot është mbajtuar edhe një program nga fëmijët e klasave të para të shkollës fillore “Lagjja e re”, në shënimin e “Festës së Abetares”.

“Të dashur nxënës, prindër, e arsimtarë, sot është nderë i veçant që jam prezent në shënimin e Festës së Abetares, së bashku me ju. Falë angazhimit të madh të arsimtarëve, stafit të shkollave dhe prindërve, po arsimohen brezat e rinjë. Besoj që këta fëmijë janë me fat që i kanë mësuesit e mirë. Këta janë e ardhmja e jonë, dhe shumë shpejt do t’i shohim të diplomuar, të profilizuar në drejtime të ndryshme, të gatshëm për ta udhehequr shtetin”, tha kryetari Haziri. /2lonline/