Më 10 shtator konstituohet Kuvendi i ri i Shqipërisë

Presidenti i Shqipërisë, Ilir Meta, ka nxjerr dekretin për konstituimin e Kuvendit të ri të Shqipërisë.

Sipas dekretit, mbledhja parë e Legjislaturës së X-të të Kuvendit të Republikës së Shqipërisë do të mbahet më 10 shtator.

Ky është dekreti i presidentit Meta:

Në mbështetje të nenit 65 pika 1, 67 pika 1, dhe 93 të Kushtetutës së Republikës së Shqipërisë, pas zhvillimit të zgjedhjeve të përgjithshme për Kuvendin e Republikës së Shqipërisë të datës 25.04.2021, rezultati përfundimtar i të cilave është shpallur nga Komisioni Qendror i Zgjedhjeve përmes Vendimit nr. 21, datë 13.07.2021, të Komisionit Rregullator, si dhe në kushtet kur Legjislaturës së IX-të të Kuvendit, i përfundon mandati në datën 09.09.2021,

Dekretoj:

Neni 1

Ditën e premte, në datë 10 shtator 2021, ora 10:00, thirret për t`u mbajtur mbledhja e parë e Legjislaturës së X-të të Kuvendit të Republikës së Shqipërisë.

Neni 2

Ky dekret hyn në fuqi menjëherë.