Mbyllet me sukses Edicioni IV i Festivalit të Teatrit të Shkollave të Mesme

/Organizata Kulturore “Anamour”/

Nën organizimin e Organizatës Kulturore ANAMOUR, e cila vazhdon të sjellë energji të reja dhe risi të vazhdueshme në skenën kulturore, u përmbyll me sukses të plotë Edicioni IV i Festivalit të Teatrit të Shkollave të Mesme. Ky edicion erdhi i ndërtuar mbi një koncept të qartë artistik, me qasje moderne në organizim, marketing, brendim dhe komunikim aktiv përmes rrjeteve sociale, duke e bërë teatrin më të afërt, më të dukshëm dhe më të ndjekur nga publiku i ri.

Festivali u shndërrua në një hapësirë reale krijimi, ku nxënësit e shkollave të mesme, të udhëhequr nga mentorë profesionistë, sollën shfaqje me ndjeshmëri të thellë artistike, guxim krijues dhe mesazhe që preknin realitetin bashkëkohor. Skena u bë vend i dialogut, reflektimit dhe emocioneve, duke dëshmuar se arti rinor ka potencial të madh dhe zë të fuqishëm.

Falënderime të veçanta i shkojnë Komunës së Gjilanit, për mbështetjen institucionale dhe vizionin kulturor, si dhe Drejtorisë për Kulturë dhe Drejtorit Kushtrim Zeqiri, për përkrahjen e vazhdueshme dhe bashkëpunimin konkret në realizimin e këtij festivali.

Mirënjohje e sinqertë për Drejtorin e Teatrit të Qytetit të Gjilanit, Erson Zymberi, për përkushtimin profesional dhe për hapjen e skenës institucionale për të rinjtë, duke e kthyer teatrin në një hapësirë edukimi dhe zhvillimi artistik.

Falënderim i veçantë për Drejtorin e Festivalit, Ernest Zymberi, për vizionin, udhëheqjen dhe angazhimin e pandërprerë në ndërtimin dhe zhvillimin e këtij festivali si një ngjarje me peshë kulturore.

Mirënjohje për trajnerët dhe mentorët:

Alban Shahiqi, Avni Shkodra, Egzona Salihu, Florent Salihu dhe Valon Nuhiu, të cilët me profesionalizëm dhe përkushtim udhëhoqën të rinjtë në një proces të plotë artistik, duke i ndihmuar ata të ndërtojnë jo vetëm shfaqje, por edhe besim në veten e tyre si krijues.

Falënderojmë Blend Arifin, për regjinë, realizimin e materialeve vizuale dhe dokumentimin profesional të festivalit gjatë gjithë rrugëtimit të tij.

Mirënjohje për kostumografen Leudita Hyseni, për krijimin e identitetit vizual dhe estetik të shfaqjeve.

Falënderim për mjeshtrin e ndriçimit Fatmir Halili, për ndërtimin e atmosferës skenike dhe gjuhën e dritës.

Falënderim i veçantë për mjeshtrin e zërimit Alban Limani, për qartësinë dhe balancën akustike gjatë gjithë festivalit.

Mirënjohje për Kompaninë KAMELEON, për dizajnin, brendimin dhe identitetin vizual të festivalit.

Falënderojmë organizatorin Dhurim Ismaili – Dajki, për koordinimin dhe angazhimin e palëkundur në çdo fazë të realizimit.

Mirënjohje për garderobieren Kledia Kurtalani, për profesionalizmin dhe përkujdesjen në prapaskenë.

Falënderim për punëtorët teknikë:

Mejdi Hoti, Haki Aliu, Fehmi Hoti dhe Selami Hoti, pa të cilët asnjë skenë nuk do të funksiononte.

Falënderim për rekuiziterin Suad Berisha, për detajet skenike që i dhanë autenticitet çdo shfaqjeje.

Festivali u karakterizua nga shikueshmëri e lartë, sallë të mbushura plot, reagime emocionale dhe prani të vazhdueshme të publikut, duke dëshmuar ndikimin e tij të drejtpërdrejtë në jetën kulturore të qytetit të Gjilanit dhe më gjerë.

Si përmbyllje e aktiviteteve, në natën finale të festivalit, publikut iu prezantua dokumentari i realizuar gjatë gjithë procesit, që nga audicionet e para, provat intensive, puna me mentorët, emocionet pas skenës, e deri tek mbyllja e perdeve. Ky dokumentar shërbeu si kurorëzim i gjithë këtij rrugëtimi artistik dhe si dëshmi e një pune të sinqertë, të përkushtuar dhe profesionale.

Edicioni IV i Festivalit të Teatrit të Shkollave të Mesme u mbyll si një sukses i plotë – me shikues, me ndikim dhe me një vizion të qartë për të ardhmen e artit rinor.

Deri në edicionin e ardhshëm, skena mbetet e hapur.

Anamour pour le théâtre