Mbrojtja Civile nuk integrohet në polici

Ministrja për Dialog, Edita Tahiri, ka thënë se ish-pjesëtarët e së ashtuquajturës “Mbrojtja civile” nuk do të integrohen në Polici të Kosovës apo në institucione të tjera të sigurisë.

Ajo ka deklaruar se ata do të mund të integrohen vetëm në institucione shtetërore civile që kanë veprimtari lokale. Në këtë intervistë për “Epokën e re”, Tahiri ka vlerësuar se marrëveshja për shpërbërjen e kësaj strukture parasheh edhe integrimin e ish-pjesëtarëve të saj.

Ajo ka bërë me dije se kjo marrëveshje në tërësi duhet të zbatohet deri më 1 shtator të këtij viti. Sipas Tahirit, kjo marrëveshje parasheh edhe destinimin e objekteve dhe pajisjeve që kjo strukturë i ka shfrytëzuar deri më tani.

Ministrja Tahiri e ka ftuar BE-në të jetë e angazhuar maksimalisht në procesin e zbatimit të marrëveshjes për zhbërjen e ‘Mbrojtjes Civile’ dhe zbatimin e marrëveshjes për çështje të drejtësisë, në mënyrë që Serbia të mos e neglizhojë këtë proces.