Mbi 50 delegacione kanë konfirmuar pjesëmarrjen në inaugurimin e Thaçit-president

Mbi 50 delegacione të shteteve të ndryshme e kanë konfirmuar deri më sot pjesëmarrjen në inaugurimin e presidentit të zgjedhur të Kosovës, Hashim Thaçi. Delegacione nga shtete të ndryshme të Ballkanit, nga Egjipti e deri te Amerika Latine do të jenë të pranishme në këtë ceremoni.
Këtë e ka konfirmuar edhe këshilltari i Thaçit, Abelard Tahiri.

Në një prononcim për Telegrafin, Tahiri ka thënë se Këshilli Organizativ është në vlugun më të madh të punëve, sepse ceremonia e inaugurimit është njëherësh edhe ngjarja më e madhe protokollare në historinë e deritashme të Kosovës.

Ndryshe, presidenti i zgjedhur Hashim Thaçi do të betohet më 7 prill para deputetëve të Kuvendit të Kosovës, kurse me 8 prill, në orën 11:00, me një ceremoni solemne edhe do të inaugurohet si president i ri.