Mbahet mbledhja e katërt e Komitetit për Politikë dhe Financa në Kamenicë

Është mbajtur sot mbledhja e katërt e rregullt e Komitetit për Politikë dhe Financa në kuadër të kësaj legjislature të Kuvendit Komunal të Kamenicës, ku janë shqyrtuar dhe miratuar një sërë çështjesh me rëndësi për funksionimin e komunës.

Mbledhjen e ka hapur kryesuesja e Kuvendit Komunal, Arbnore Beqiraj-Fera, e cila ka prezantuar para anëtarëve rendin e ditës me gjashtë pika për shqyrtim.

Fillimisht, anëtarët e komitetit kanë shqyrtuar dhe miratuar procesverbalin nga mbledhja e tretë e Komitetit për Politikë dhe Financa.

Në vazhdim është diskutuar raporti financiar buxhetor i Komunës së Kamenicës për periudhën janar-mars 2026, i cili është miratuar nga anëtarët e komitetit.

Po ashtu, gjatë kësaj mbledhjeje është shqyrtuar dhe aprovuar edhe propozim-vendimi për ndarjen e mjeteve financiare për punëtorët e NPL “Dardana” Sh.A.

Një tjetër pikë e rëndësishme ishte edhe propozim-vendimi për dhënien në shfrytëzim të pronës së paluajtshme komunale për Policinë e Republikës së Kosovës.

Në rend dite ka qenë edhe propozimi për miratimin e rregullores për organizimin e brendshëm dhe sistematizimin e vendeve të punës në Komunën e Kamenicës, i cili gjithashtu ka marrë mbështetjen e anëtarëve të komitetit.

Në fund, në pikën “Të ndryshme”, janë trajtuar çështje të tjera me interes për komunën.

Të gjitha pikat e rendit të ditës janë miratuar unanimisht, me votat pro të të gjithë anëtarëve të pranishëm në mbledhje. /2LONLINE/