Mbahet koncerti për fëmijë për nder të 18-vjetorit të pavarësisë

Kanë vazhduar aktivitetet me rastin e përvjetorit të 18-të të pavarësisë së Kosovës, organizuar nga Komuna e Gjilanit.

Aktivitetet vazhduan me koncertin për fëmijë në Teatrin e Qytetit, ku u prezantuan pika artistike nga baleti dhe kërcimi modern nga Dancing House.

Kryetari i Komunës së Gjilanit, Alban Hyseni, tha se fëmijët festojnë.

Ai tregoi se nën koreografinë e Naski Ahmeti. me studion e baletit Dancing House, fëmijët e qytetit sollën në skenë një program të mrekullueshëm artistik, plot ritëm, ngjyra dhe emocione.

“Me energjinë dhe buzëqeshjet e tyre, ata e bënë festën edhe më të veçantë, duke dëshmuar se 17 shkurti jeton fuqishëm në zemrat e brezit të ri”, tha kryetari Alban Hyseni.

Nga ana e saj, koreografja Naski Ahmeti ka bërë me dije se nxënësit pjesëmarrës ishin nga Studio e Baletit “Dancing House – Gjilan”, nga Shtëpia e Kulturës Kamenicë, ndërsa balerinat nga Shkolla e Muzikës Gjilan i dhanë ngjyrë artistike mbrëmjes me performancat e tyre.

Sipas saj, një moment i veçantë i koncertit ishte paraqitja e mysafires Kenza Ismajli, e cila interpretoi këngën “Kuq e Zi”, duke emocionuar publikun dhe duke e përmbyllur koncertin me atmosferë festive dhe patriotike.

“Koncerti u prit me entuziazëm të madh nga publiku dhe dëshmoi edhe një herë rëndësinë e artit në edukimin dhe zhvillimin e fëmijëve, si dhe fuqinë e bashkëpunimit institucional në promovimin e kulturës në qytetin e Gjilanit”, ka thënë Naski Ahmeti. /2LONLINE/