Mbahet diskutimi publik për caktimin e tarifave për menaxhimin e mbeturinave

Në Kamenicë, Drejtoria për Shërbime Publike, Ambient dhe Inspektorat e përfaqësuar nga Shefi i Sektorit të Mbeturinave, Hysen Jerliu, ka mbajtur diskutimin publik lidhur me Propozim-Vendimin për caktimin e tarifave dhe mënyrën e inkasimit të mjeteve financiare për menaxhimin e mbeturinave.

Në këtë diskutim të pranishëm ishin: Drejtoresha e Financave në Kompaninë Ecohigjiena, Leonora Ajeti-Latifi, Menaxherja e Njësisë Ecohigjiena në Kamenicë, Shejnaze Masurica, Xhelil Sahiti, anëtar i komisionit, anëtarë të komisionit për hartimin e këtij Propozim-Vendimi, përfaqësues nga Drejtoria për Buxhet dhe Financa, përfaqësues të Drejtorive të tjera komunale, zyrtarë komunal, OJQ dhe të tjerë.

Shefi i Sektorit të Mbeturinave në Komunën e Kamenicës, Hysen Jerliu, e hapi këtë diskutim, duke paraqitur para të pranishmëve Propozim-Vendimin për caktimin e tarifave dhe mënyrën e inkasimit të mjeteve financiare për menaxhimin e mbeturinave.

“Faleminderit që jeni të pranishëm në këtë diskutim. Me siguri e keni parë këtë Propozim-Vendim për format e tarifave. Është një ndryshim i lehtë i tarifave. Ne jemi të hapur që nëse keni propozime të reja që t’i pranojmë. Pra tarifat janë këto: tek Ekonomitë Familjare është tarfia fikse 6 Euro, ndërsa tek veprimtaritë e tjera të ndryshme, dallon varësisht prej madhësisë së biznesit”, ka thënë ai.

Pas paraqitjes së Propozim-Vendimit është hapur debati për pyetje nga të pranishmit, të cilat kishin të bënin kryesisht më veprimtaritë biznesore për tarifën, për zbrazjen e mbeturinave si dhe për pagesën e borgjeve. /2LONLINE/