Mbahet akademia solemne për nder të 11 vjetorit të Pavarësisë së Kosovës

Mbahet akademia solemne për nder të 11 vjetorit të Pavarësisë së Kosovës

Për nder të 11 vjetorit të Pavarësisë së Kosovës, Drejtoria për Kulturë, Rini dhe Sport në Kamenicë ka organizuar aktivitete për shënimin e kësaj dite.

Në akademinë solemne që është mbajtur në Shtëpinë e Kulturës “Isa Kastrati”, ishin të pranishëm kryetari Qëndron Kastrati bashkë me kabinetin, zyrtarë komunal e qytetarë të shumtë.

Kryetari Kastrati uroi të gjithë të pranishmit dhe tha se sot është ndjerë mirë për shumë arsye dhe se i përkulet kontributit historik të individëve e grupeve që u angazhuan e luftuan për lirinë e pavarësinë e Kosovës.

“Sot kur festojmë 11 vjetorin e pavarësisë, shfrytëzoj rastin të ftoj secilin nga ne të reflektojmë. Ta përkthejmë lavdinë e dëshmorëve në guxim për të punuar, e shpresën e të ardhmes në vision për rezultate”, tha ai.

Këtë festë edhe më madhështore e bënë kori, orkestra e artistët e qytetit tonë, që performuan e kënduan për të gjithë të pranishmit.

Ndërkaq, Drejtori për Kulturë, Rini dhe Sport Arianit Ibrahimi, tha se bashkë me ekipën e tij kanë bërë të pamundurën që qytetarëve të Kamenicës t’u sjellin një program festiv të veçantë me këngë e valle patriotike e tradicionale, ashtu siç duhet të festohet kjo ditë.

E gjithashtu edhe përfaqësuesi i veteranëve të luftës së UÇK-së Milaim Limoni i uroi qytetarët për këtë fest.

Ky manifestim i organizuar nga DKRS, u përmbyll me valle tradicionale nga Ansambli i Këngëve e Vallëve “Albana”.

KOMENTE