Grupi parlamentar i Lëvizjes Vetëvendosje, Komiteti për Energjetikë përmes një Komunikate ka bërë të ditur se sot qytetarët e Kosovës ishin dëshmitarë të shkeljeje të pashembullt në Kuvendin e Republikës së Kosovës. Në votim u hodhën rekomandimet e Komisionit për të Drejtat e Njeriut, Barazi Gjinore, Persona të Pagjetur dhe Peticione lidhur me peticionin e nënshkruar nga 33 mijë qytetarë të Kosovës.
Në vend që Komisioni t’i rekomandonte për votim 5 kërkesat origjinale të qytetarëve nënshkrues, i ndryshoi ato, dhe formuloi rekomandime që nuk kanë të bëjnë asgjë me kërkesat burimore të peticionit. Dy prej kërkesave bazike të peticionit ishin: anulimi i vendimit të ZRRE-së së vitit të kaluar për rritjen e çmimit të energjisë elektrike, si dhe shkarkimi i bordit të papërgjegjshëm treanëtarësh të këtij institucioni që është shitur te privatizuesi i KEDS-it. ZRRE-ja me këto vendime nuk e ka mbrojtur interesin qytetar, por ka shërbyer si mekanizëm për profit të shpejtë milionësh të kompanisë private në kurriz të mirëqenies së qytetarëve. Këto dy kërkesa fare nuk figurojnë në rekomandimet e rishkruara të Komisionit.
Përmes këtij veprimi Komisioni përkatës parlamentar ka tejkaluar kompetencat e veta duke bërë shkelje të papranueshme. Ky Komision parlamentar duhet të shqyrtoj peticione, e jo të tjetërsojë peticione. Qytetarët e dinë fare mirë çka kanë nënshkruar dhe janë plotësisht të vetëdijshëm për kërkesat e drejta. Komisioni ose duhet t’i qesë këto kërkesa në votim, ose t’i hedh poshtë ato, nëse është kundër interes qytetar. Por jo t’i riinterpretojë kërkesat, duke i shtrembëruar ato në thelb, aq sa t’ua humb fare kuptimin.
Për nga definicioni Kuvendi i Republikës është institucioni më i lartë në vend i përfaqësimit të interesave shoqërore e popullore. Por sot mund të themi se pamë konkretisht shkeljen e përfaqësimit të interesave qytetare në këtë institucion.
Peticioni me 33 mijë nënshkrime i organizuar nga Koalicioni i Qytetarëve konsumatorë, Sindikatave dhe Organizatave Joqeveritare ‘Kundër rritjes së Çmimit të Energjisë Elektrike nga ZRRE’ iu paraqit Kuvendin në këtë formë e përmbajtje:
Kërkojmë nga Kuvendi i Kosovës që:
1) Të rekomandoj që Zyra e Rregullatorit për Energji – ZRRE të anuloj Vendimin V_645_2014 e Zyrës së Rregullatorit të Energjisë të datës 29 gusht 2014, sidomos duke njohur faktin që rrethanat e jashtëzakonshme (me rastin e shpërthimit në Kosovën A) që u përdoren si arsyetim për rritjen e çmimit të energjisë kanë kaluar;
2) Të kërkon shkarkimin e anëtareve të Bordit të ZRRE-se, duke rikujtuar dështimin e këtyre të fundit që të mbrojnë interesin publik të qytetarëve të Republikës së Kosovës, si dhe të ketë parasysh: a. Mos marrjen për bazë të gjendjes sociale dhe ekonomike të konsumatorëve me rastin e vendosjes së tarifave të reja, ashtu siç kërkohet me nenin 1 të Ligjit për ZRRE; b. Ndikimin politik të anëtarëve të Bordit, me ç’rast Bordi i ZRRE nuk ka marrë vendim për tarifat e energjisë para datës 31 mars 2014, atëherë kur kanë skaduar tarifat e energjisë, por duke marrë vendim menjëherë pas zgjedhjeve nacionale të 8 qershorit 2014;
3) Të obligoj Qeverinë që të sjellë në Kuvend propozimet për ndryshimin e Ligjit nr. 03/L-146 për Tatimin mbi Vlerën e Shtuar, ku do të largohej TVSh prej 16% nga fatura e energjisë elektrike;
4) Të anuloj vendimin e Kuvendit të Kosovës dhe të Komisionit të Pavarur për Miniera dhe Minerale për rentën prej 3 euro për ton qymyri të shfrytëzuar;
5) Të obligoj Qeverinë që të sjellë në Kuvend propozimet për ndryshimin e Ligjit Nr.03/L-185 për Zyrën e Rregullatorit të Energjisë, sipas së cilitdo të obligohet ZRRE të ndryshoj rregullat për vendosjen e çmimeve. Po ashtu, përmes këtij Ligjit të ri për ZRRE, Kuvendi duhet të obligojë Bordin e ZRRE që përveç ndryshimit të rregulloreve për vendosjen e çmimeve, të aprovoj një rregullore për mënyrën e përllogaritjes së gjendjes sociale dhe ekonomike të konsumatorëve të energjisë, ashtu siç kërkohet me nenin 1, pika 4, të Ligjit aktual për ZRRE.
Ne i mbështesim pa rezerva këto kërkesa dhe do të vijojmë aktivitetet në Kuvend e jashtë tij që këto kërkesa të përmbushen. Mosadresimi i kësaj çështje edhe këtë herë sigurisht që do të pasohet më protesta të konsumatorëve gjatë vjeshtës e dimrit dhe po ashtu papërgjegjshmëria e Zyrë së Rregullatorit do të ketë si rezultat një krizë të thellë energjitike në vitet e ardhshme.