/2L ONLINE/ – Fatmir Matoshi, nënkryetar i Komunës së Kamenicës, thotë se ditëve të fundit i kanë intensifikuar takimet dhe janë përafruar punët rreth shpalljes së tenderit për ndërtimin e objekteve në Pikën Kufitare në “Kapi”.
“Për këtë qëllim gjatë këtyre ditëve kam pasur takime në Policinë Kufitare në Prishtinë, sikundër edhe e kemi pasur një vizitë të Policisë Kufitare në Kamenicë. Gjithashtu kam pasur takim edhe me z. Gazmir Raci, këshilltar i Ministres Edita Tahiri. Të premten është takimi i radhës për aplikim për marrjen e kushteve urbanistike për lejen për ndërtimin e PKK ”Kapi”. Ndërtimi i pikës do të kushtojë rreth 100 mijë euro, ndërsa këto ditë po bëhet edhe studimi i vijës së furnizimit me energji elektrike të ndërtesave në kufi, si dhe furnizimit me ujë. Plani është që Pika Kufitare “Kapia” të jetë e gatshme për qarkullimin e njerëzve në shtator 2016.
Ëndrra po realizohet. Urime”, shkruan në profilin e tij, Fatmir Matoshi. /2L ONLINE/