Marovca: Komuna e Kamenicës vazhdon me bashkëpunimin e ngushtë me Këshillin e Europës

Zëdhënësja e Komunës së Kamenicës, Lidiona Marovca, së bashku me Shefen e Zyrës së Këshillit të Europës në Kosovë, Mary-Ann Henessy, kanë nënshkruar kontratën për projektin “Forcimi i qeverisjes shumënivelëshe dhe demokracisë pjesëmarrëse”.

Marovca ka bërë të ditur se në kuadër të këtij projekti, Komuna e Kamenicës do të forcojë edhe më shumë transparencën dhe llogaridhënien për qytetarët e saj, si dhe kjo është përpjekje shtesë për të treguar edhe një herë vullnetin institucional për të punuar edhe më shumë në implementimin e vlerave të demokracisë.

Sipas saj, në mesin e komunave të Kosovës të cilat kanë aplikuar në këtë projekt, Komuna e Kamenicës është në mesin e pesë komunave përfituese të grantit.

“Rikujtojmë se Komuna e Kamenicës ka pasur bashkëpunim edhe më herët me Këshillin e Europës në kuadër të projektit ROMACTED II”, ka bërë me dije Zëdhënësja e Komunës së Kamenicës, Lidiona Marovca.  /2LONLINE/