Maloku: “Interesi” i shtetit “rimartoi” PDK-në e LDK-në
Njohësi i çështjeve politike, Fadil Maloku, ka thënë se “interesi” për shtetin ka realizuar “martesën” e PDK-së me LDK-në.
Pavarësisht kësaj, ai ka thënë se kjo rimartesë do t’i dëmtojë të dyja partitë në të ardhmen.
“‘Martesa’ me PDK-në, në fakt, edhe herën e parë ishte bërë pa dëshirën dhe interesimin e anëtarësisë së anëtarëve të LDK-së, por ja që ‘interesi’ i shtetit dhe i vendit (do të thonë padyshim krerët e LDK-së) na shtyri të ‘rimartohemi’ edhe një herë me PDK-në! Për demokracinë (e padyshim edhe për PDK-në) e brishtë kosovare, realisht do të ishte e shëndetshme të qëndronte në opozitë. Në mënyrë që të përfitonte (pra të ritushohej) si subjekt edhe si ideologji!”, ka thënë Maloku në këtë intervistë për “Epokën e re”.
Sipas tij, ky koalicion duhet parë nga disa rrafshe. “Nëse e shikojmë nga rrafshi social dhe ai ekonomik, na mbanë shpresa se, meqë janë dy parti të mëdha, mundësitë e përmirësimit të gjendjes janë reale. Ndërkaq, nëse e shikojmë nga prizmi politik, kujtoj se ky koalicion do t’i ‘përpijë’ koncesionet e Brukselit! Pra, për mendimin tim, ky koalicion do të ballafaqohet me dilemën hamletiane: Të ndërtojmë shtet të fortë, me të gjitha mekanizmat dhe institucionet përcjellëse, apo ta forcojmë demokracinë?”, ka vlerësuar Maloku.
Ndërsa sa i përket rolit të opozitës, Maloku ka thënë se partitë opozitare tani e tutje, përveç petkut të nacionalizmit, duhet t’u kthehen edhe problemeve reale.
“Kujtoj se Vetëvendosja ka shanse reale ta marrë primatin e një opozite të ngjeshur (ani pse, ka disa minuse në publik me futje-daljen e saj në LAN!) dhe tipike demokratike, ngase thjesht në legjislaturën e kaluar ishte e hendikepuar me ‘hijen’ e LDK-së. AAK-ja ambiciet e veta tani duhet t’i kanalizojë kah e ardhmja, pra kah problemet reale të qytetarëve, nëse dëshiron të mbajë (apo edhe të rritë) elektoratin e vet…e probleme të tilla ka me bollëk! Vetëm se duhet mësuar dhe kuptuar ‘çelësin’ e artikulimit në publik, ngase kam shumë bindje se koha e lidershipave të ‘paqes’ dhe atyre të ‘luftës’ është duke perënduar!”, është shprehur Maloku./epoka e re/