LVV: Arrestohet aktivisti Alket Zeqiri

Në orët e hershme të mëngjesit, Policia e Kosovës ka arrestuar aktivistin e Lëvizjes Vetëvendosje, Alket Zeqiri. “Policia e Kosovës vazhdon të përdoret nga ky pushtet kriminal për ta shtypur Lëvizjen VETËVENDOSJE! ashtu që të ketë hapësirë të mjaftueshme për t’i realizuar interesat e Serbisë në Kosovë. Aktivisti Alket Zeqiri u arrestua në shtëpinë e tij në Fushë Kosovë, me ç’rast edhe iu bastis shtëpia, duke i terrorizuar kështu familjarët e aktivistit”, njofton përmes një komunikate Vetëvnedosje.

Lëvizjes Vetëvendosje thotë se i bënë thirrje këtij “pushteti që të heq dorë nga këto veprime të pista e të padrejta, si përndjekjet ndaj opozitës dhe deportimet e shtetasve shqiptarë, të heq dorë nga marrëveshjet e 25 dhe 26 gushtit si dhe sa më parë të shpallen zgjedhjet e reja”.

Vetëm në këtë mënyrë, shton kjo parti, mund të kthehet normaliteti në Kosovë. “Nëse nuk ndodh një gjë e tillë, situata do të tensionohet edhe më shumë”, thuhet në komunikatën e Lëvizjes Vetëvendosje.