Lutfi Haziri: LDK është parti e anëtarësisë së saj e jo e funksionarëve

Kryetari i Lidhjes Demokratike të Kosovës, Dega në Gjilan, Lutfi Haziri ka bërë me dije se ky subjekt po vazhdon procesin e diskutimeve të brendshme dhe koordinimit me strukturat partiake, me synim forcimin e organizimit dhe përcaktimin e prioriteteve politike për periudhën në vijim.

Sipas tij, pas takimit me Kryesinë e Degës, diskutimet kanë vazhduar me Grupin e Këshilltarëve Komunalë dhe kryetarët e nëndegëve, ndërsa gjatë javës së ardhshme ky proces do të shtrihet edhe në strukturat e tjera të LDK-së në Gjilan.

Haziri, ka theksuar rëndësinë e përgatitjeve të hershme për zgjedhjet e brendshme partiake, të cilat duhet të karakterizohen nga demokracia e brendshme, përfshirja, mobilizimi dhe forcimi i strukturave.

Sipas tij, një pjesë e rëndësishme e diskutimeve i është kushtuar edhe rolit të LDK-së në opozitarizmin komunal, përgjegjësisë për të adresuar shqetësimet e qytetarëve dhe ndërtimit të një alternative serioze qeverisëse për Gjilanin.

“LDK në Gjilan mbetet e përkushtuar që, përmes angazhimit politik dhe organizativ, të ndërtojë një gjeneratë të re politike, e cila do ta vazhdojë misionin për një Gjilan të zhvilluar, me perspektivë të qartë ekonomike, institucionale e shoqërore dhe me rol të fuqishëm si qendër rajonale”, ka thënë Haziri.

Sipas të parit të LDK-së në Gjilan, ky proces nuk është vetëm përgatitje organizative për zgjedhjet e brendshme, por edhe një mundësi për ripërtëritje, bashkim dhe fuqizim të LDK-së, duke krijuar hapësirë për energji të reja, ide të guximshme dhe përgjegjësi të përbashkët për të ardhmen e Gjilanit.

“Jemi në javën kur, më 21 nëntor shënohet 30-vjetori i ndarjes nga jeta të prof. dr. Xhavit Ahmetit. Gjilani, Anamorava, shqiptarët ia kanë për borxh vlerësimin dhe përkujtimin këtij burri të madh të kombit. Angazhimi i tij për liri, Pavarësi e Demokraci duhet të vlerësohet e nderohet”, ka thënë në fund, Lutfi Haziri, kryetari i LDK-së Dega në Gjilan.   /2LONLINE/