Lutfi Haziri: Lavdi e përjetshme veprës heroike të Rexhep Malës e Nuhi Berishës dhe të gjithë dëshmorëve e heronjve të kombit!

Sot kanë nisur aktivitetet e Manifestimit “Flaka e Janarit”, përmes të cilave nderohen të rënët për liri, e kreu i LDK-së së Gjilanit, Lutfi Haziri, në një postim të tij, të shoqëruar edhe me një foto ku Flakadanin e Janarit është duke e ndezur babai i dëshmorit Nuhi Berisha, baca Rexhë, ka shkruar se “ Sot, familjet Mala e Berisha, sikurse çdo vit, ndiejnë krenarinë e madhe dhe dhimbjen në të njëjtën kohë, pasi i dhanë kombit e atdheut më të dashurit e tyre, për t’i gëzuar miliona shqiptarë me lirinë dhe pavarësinë në republikën e tyre”.

“Sot na mungon shembulli i qëndresës dhe simboli ynë, babai i dëshmorit Nuhi Berisha, baca Rexhë.  Faleminderit, baca Rexhë, për krejt atë që ke bërë për ne, për rreth një shekull jete, faleminderit që na mësove qëndresën, që nuk u theve asnjëherë, që na mësove si të mos koritemi asnjëherë para familjes, para atdheut dhe para Zotit. Lavdi e përjetshme veprës heroike të Rexhep Malës e Nuhi Berishës dhe të gjithë dëshmorëve e heronjve të kombit”, ka shkruar Haziri në profilin e tij.  /2LONLINE/