Shtyrja e seancës konstituive, sipas analistëve kosovarë, e dëmton shumë procesin e formimit të institucioneve të reja në Kosovë. Sipas tyre, ky ngërç i mungesës së institucioneve duhet të zgjidhet sa më parë.
Analisti Armend Muja, duke e komentuar shtyrjen e seancës konstituive të Kuvendit të Kosovë e cila është planifikuar të mbahej sot, ka theksuar se realiteti i prodhuar nga sistemi politik në Kosovë pas zgjedhje nacionale të 8 qershorit, është se kemi dy forca përcaktuese të kahjes politike, që sipas tij janë: Lëvizja Vetëvendosje (VV) dhe Lista Srpska.
Ai në një prononcim për Telegrafin ka thënë se shtyrja e seancës konstituive të Kuvendit të Kosovës, është demonstrim i pakënaqësisë së Listës Srpska rreth hyrjes së VV-së në marrëveshje me bllokun, dhe njëkohësisht sipas tij, shtyrja e seancës është përpjekje e Beogradit që të shfaq pakënaqësinë me implikimet që rezultojnë nga kjo marrëveshje.
“Në mungesë të Listës Srpska, në konstituimin e institucioneve të reja, mund të kemi zgjedhje të kryeparlamentarit, mirëpo jo edhe krijim të qeverise. Lista Srpska është vendimtare në krijimin e ekzekutivit kosovar”, ka thënë Muja.