Liridon Ahmeti drejtor i ri sportiv i SC Gjilani
Drejtues të SC Gjilanit kanë bërë me dije se Liridon Ahmeti është emëruar Drejtor Sportiv i klubit.
Ahmeti emërohet në krye të departamentit sportiv në klub pas përvojave në fushën e menaxhimit sportiv, teksa së fundmi ka ushtruar pozitën e drejtori sportiv te Klubi Futbollistik Vushtrria.
SC Gjilani përmes komunikatës zyrtare ka bërë me dije se ky emërim vjen si pjesë e strategjisë së klubit për forcimin e strukturave drejtuese, me synim rritjen e konkurrueshmërisë dhe zhvillimin e qëndrueshëm të klubit.
“SC Gjilani i uron suksese Liridon Ahmetit në këtë detyrë të rëndësishme dhe shpreh besimin se bashkëpunimi i ndërsjellë do të kontribuojë në arritje të reja sportive për klubin”, thuhet në njoftimin e Zyrës për Informim dhe Komunikim të SC Gjilanit. /2LONLINE/