Ligjëratë ndërkomunitare për të Drejtat e Njeriut dhe Mbrojtjen nga Diskriminimi në Kamenicë

Në kuadër të zbatimit të Planit Lokal të Veprimit për Strategjinë për Avancimin e të Drejtave të Komuniteteve Rom dhe Ashkali 2022–2026, në Komunën e Kamenicës u mbajt një aktivitet ndërkomunitar me ligjëratë informuese për të drejtat e njeriut dhe mbrojtjen nga diskriminimi.

Aktiviteti u organizua nga Koordinatorja e Njësisë Komunale për të Drejtat e Njeriut, znj.Nazmije Demolli Kastrati, në bashkëpunim me përfaqësuesen e komunitetit rom, znj. Bahtije Kryeziu dhe me mbështetjen e OSBE-së, përfaqësuar nga znj. Vjosa Emini dhe z. Jeton Lika.

Gjatë aktivitetit u ligjërua mbi të drejtat themelore të njeriut, mbrojtjen nga diskriminimi dhe rëndësinë e raportimit të rasteve të shkeljes së të drejtave. Përmes diskutimit interaktiv, pjesëmarrësit u informuan mbi institucionet dhe personat përgjegjës ku mund të drejtohen, si dhe për mundësinë e raportimit përmes platformës raportodiskriminimin.org.

Po ashtu, para të pranishmëve u prezantua videoja “Bashkë kundër diskriminimit”, e cila u mirëprit nga pjesëmarrësit për mesazhet informuese lidhur me barazinë dhe reagimin ndaj diskriminimit.

Në aktivitet morën pjesë rreth 50 fëmijë nga komuniteti rom, nga Kamenica dhe fshati Berivojcë. Qëllimi i aktivitetit ishte njohja e të drejtave të tyre, rritja e vetëdijes për raportimin e rasteve të diskriminimit dhe promovimi i barazisë dhe bashkëjetesës ndërmjet komuniteteve.

Në përmbyllje, ekipi i terrenit i OSBE-së shpërndau materiale edukative dhe rekreative për fëmijët pjesëmarrës. /2LONLINE/