Lerini të flasin!

Shkruan: Aferdita Morina- Biffar
/2L ONLINE/ – Kanë filluar të flasin komandantët me radhë. Shokët e luftës e të idealit. Kështu quheshin mes vete tash e 16 vjet, kur mbronin njëri- tjetrin, po u tha e u fol ndonjë fjalë e keqe për ndonjërin prej tyre. U pasuruan, ndërruan edhe ngjyrën e flokëve, stilin e veshjes e madje edhe u “shkolluan”! Gjithëçka ecte vaj e si është më së miri për ta. Rahatuan e punësuan far e fis, dikënd në KEK, ca në PTK, të tjerë në RTK e aeroport.. e kështu me radhë..

Kosova, u shndërrua në prone të tyre, në një livadh të madh, që e kositnin pasi e kishin ndarë mes vete, sipas marrëveshjeve që veç ata i dinin si e kishin bërë.

Kosovën e shndërruan në parajsë të vogël për vete, dhe familjet e tyre, ndërsa në ferr të madh mjerimi e varfëri e për të tjerët. Me bajrak në dorë, na thonin për ditë se na e sollën lirinë, dhe ky është çmimi që Kosova dhe populli i saj duhej të paguante në këmbim të meritave të tyre. Për vete i morën të gjitha e popullit ia lanë ta thithte vetëm ajrin ( në atë pjesë ku eventualisht nuk e kishin ndotur me gurthyes), se vleresonin ata, nuk kishte bërë më shumë për lirinë. Madje as NATO-së nuk ia njihnin dhe vlerësonin kontributin për çlirim. Nuk u pelqente kur populli, shprehte simpatinë e merituar për ushtarët që shërbenin në KFOR.

E populli nuk ndaloi kurrë së qeni mirënjohës për këta ushtarë të të gjitha vendeve të botës që sollën lirinë e shumëpritur dhe që s’kërkonin asgjë në këmbim për komandantët e tyre, ndërkohë që po ky popull ishte dëshmitar i vitin 1999, kur letra të varura gjithandej…madje edhe në pemë e lisa bartnin porosinë; “mos e prek- e nxanme – nga X.Y komandanti!”, e si për dreq komandantët tanë dolën të ishin shumë..aq shumë sa nuk mbeti gjë pa u zënë e uzurpuar…e ushtarët e tyre nuk shiheshin gjëkundi. Ushtarët, ata të vërtetit, shumica ishin vrarë, ndërsa ata që kishin mbetur gjallë, menjëherë pas luftës ishin shkrirë e bërë një me popullin, që thithte ajër lirie dhe shikonte dramën që po luanin komandantët pa ushtarë.
Drama duhej ndjekur në qetësi dhe pa zhurmë. Pa pyetje për vrasjet e shumta enigmatike të pasluftës. Nuk i duronin pyetjet, sado që të pakët ishin ata zëra që guxonin të pyesnin se si ndodhen ato ?! Kushdo që guxonte, ta thoshte të vërtetën shpallej armik i lirisë!

Por, ja që vjen dita e shpirti u trazohet! Një fjali e shkurtër kuptimplot e; Gjykatë Speciale…dhe papritmas bota fillon tu shembet nën këmbë. Tash nuk është se po i pyet kush se kush vrau, kush vodhi e kush rrjepi më shumë në këtë vend. Po flasin vet e po e pyesin njëri – tjetrin. Do të vazhdojnë të flasin, do ti tregojnë të gjitha një nga një…e një për një…

Lëmshit ka filluar ti gjendet fija.. s’ka më forcë ta ndaloj shthurrjen e këtij lëmshi që lirinë e mbajti peng për 16 vjet. Ndoshta, dikënd prej tyre e ka zën gjaku, dikënd mallkimet, e të tjerët dehja nga deliri i madhështisë së rrejshm e që kanë jetuar tash e sa vite.

Prandaj, lerini le të flasin.Të thonë cfarë kanë për të thënë. Nuk do të thonë asgjë më shumë e asgjë më pak se atë që populli e ka ditur tash e 16 vjet… por që fjalët në grykë ua kanë lënë kujtdo që ka marrë guximin ti thotë hapur e me zë ..
Po shoshiten këto ditë vetëm ca detaje të (pa)ditura që do të plotësojnë mozaikun si të tërë.

E ju njerëzit e mire të vendit tim, ju që për vite të tëra u mbeti të thithni vetëm ajër lirie, mos u trazoni e mos u trishtoni nga rrëfimet e tyre, sado të neveritshme e të trishta të jenë ato.

Lerini të qetë të flasin se kanë nevojë të tmerrshme të rrëfehen. Besoni që nuk po e sulmojnë njëri-tjetrin, por po rrëfehen, se shpirti po u kërkon paqe me veten.

Një ditë kështu do të rrëfehen edhe në gjykatë…mbase atje edhe do te gjejnë paqen që shpirtrat e trazuar po ua kërkojnë. Sepse ata që u pasuruan, ndërruan edhe ngjyrën e flokëve, stilin e veshjes e madje edhe u “shkolluan” nuk u bënë të tjerë, janë këta që ishin të tillë dje dhe të tillë po shpërfaqen sot!

Pas kësaj periudhe rrëfimesh, akuzash e dënimesh, Kosova dhe populli i saj do të dalin të fituar! Vetëm atëherë liria do të çilrohet e shpërfaqet në dimensionin e saj të plotë e do të ketë kuptim. Uroj që kjo ditë të vijë sa më shpejt dhe nuk do ta thithim vetëm ajrin e lirisë, por do ta shijojmë në plotni! /2L ONLINE/