LB: Jabllanoviqi iku, por Kushtetuta duhet të ndërrohet

Lëvizja për Bashkim ka lëshuar një komunikatë për media pasi që kryeministri Isa Mustafa ka deklaruar shkarkimin e ministrit Aleksandër Jabllanoviq. Kjo Lëvizje duke i quajtur deklaratat e Jballanoviqit tone fashiste e quan këtë vendim të vonuar.

“Gjithashtu, konsiderojmë se ky shkarkim është vetëm marrje me pasojën, por jo edhe me shkaktarin e problemit. Problemi kryesor është Kushtetuta e vendit, e cila minoritetit serb në Kosovë i jep fuqi të jashtëzakonshme juridike, me keqpërdorimin e së cilës ata vazhdimisht po e bëjnë jofunksional shtetin e Kosovës”, thuhet në komunikatë.

Prandaj, kjo Lëvizje insiston se vetëm një ndryshim thelbësor i Kushtetutës së Republikës së Kosovës, ku minoriteteve do t’u hiqeshin këto privilegje bllokuese ndaj shumicës, do t’i eliminonte problemet e tilla dhe do ta vendoste shtetin në binarët e funksionimit normal.