Lamtumira e fundit për luftëtarin e lirisë dhe eprorin e Policisë së Kosovës, Haki Leci

Ish-komandanti i Ushtrisë Çlirimtare të Kosovës për Zonën Operative të Karadakut, Ahmet Isufi tha se me nderime të larta, i dhanë lamtumirën e fundit luftëtarit të lirisë dhe eprorit të policisë së Kosovës, Haki Leci

“I angazhuar edhe më herët në aktivitete për liri, Hakiu nuk hezitoi, por iu bashkua vargut të luftëtarëve të lirisë të UÇK-së, në Brigadën 172 ,,Isa Kastrati’’ të Zonës Operative të Karadakut. I bindur në fitore, me tërë potencialin e tij, do të vihet në shërbim të lirisë së atdheut e shtëpia e tij bëhet baza prej nga lëvizën luftëtarët drejt frontit të luftës.

Isufi kujton se me çlirimin e vendit, Haki Leci e ndërroi uniformën por jo edhe misionin në shërbim të qytetarëve, për sigurinë dhe mbrojtjen e vendit në zonën kufitare.

“Bashkëluftëtarët, kolegët dhe qytetarët e Dardanës e të Kosovës, sot ndjenë pikëllimin nga ndarja fizike me Hakiun, por do të mbesin kujtimet e përhershme për shembëlltyrën dhe veprimtarinë në shërbim të popullit e atdheut. Ngushëllime familjes dhe të gjithëve që bashkëndjejnë pikëllimin. I lehtë i qoftë dheu i atdheut! “, thotë  Ahmet Isufi, Ish-komandanti i Ushtrisë Çlirimtare të Kosovës për Zonën Operative të Karadakut.  /2LONLINE/