KV Drita U18 shpallet Kampion i Kosovës për sezonin 2025/2026
Sot janë zhvilluar garat përfundimtare të Play-Off-it, në volejboll, në konkurrencën e meshkujve U18, ku morën pjesë katër skuadrat më të mira të sezonit nga Superliga A: Drita, Golden Eagle Theranda, Ferizaj dhe Vëllaznimi.
Pas ndeshjeve gjysmëfinale dhe finales, titulli i kampionit të Kosovës për sezonin 2025/2026 i takoi skuadrës së Drita, e cila tregoi paraqitje të shkëlqyeshme gjatë gjithë turneut final.
Rezultatet:
Gjysmëfinalet
Drita – Vëllaznimi 2:0
(25:20, 25:21)
Golden Eagle Theranda – Ferizaj 2:1
(25:16, 14:25, 16:14)
Finalja
Drita – Golden Eagle Theranda 3:0
(25:15, 25:14, 25:23)
Medaljet për ekipet pjesëmarrëse i ndanë Fadil Lumi, Komesar i Garave, dhe Ermal Maliqi, anëtar i bordit. Ndërsa kupën e kampionit e dorëzoi Gëzim Brahimi, anëtar i bordit në FVK.
FVK e uron KV Drita (M), për titullin e kampionit të Kosovës në konkurrencën U18 për meshkuj!
E, ky sukses është mirëpritur jashtëzakonisht mirë nga drejtuesit e klubit “bardh e kaltër”.
“Një tjetër sukses i madh për KV Drita Meshkujt, kësaj radhe nga gjeneratat e reja! Sot, juniorët tanë treguan karakter, disiplinë dhe cilësi të lartë duke triumfuar në finale me rezultat të pastër 3:0 në sete ndaj Golden Eagle Therandës dhe duke u shpallur për herë të parë Kampion në histori të klubit për gjeneratën U18”, thuhet në njoftimin zyrtar të klubit.
Sipas drejtuesve të klubit, kjo fitore nuk është rastësi, është rezultat i një pune të vazhdueshme, përkushtimi dhe një vizioni të qartë për zhvillimin e lojtarëve të rinj.
“KV Drita po dëshmon çdo ditë se investimi në talentet e rinj është rruga e duhur, duke ndërtuar jo vetëm sportistë të fortë, por edhe karaktere të shëndosha. Stafi i trajnerëve po bën një punë të jashtëzakonshme, duke i dhënë hapësirë dhe mbështetje çdo lojtari të ri që të zhvillohet dhe të arrijë potencialin e tij maksimal”, thuhet në njoftimin e klubit gjilanas të volejbollit. /2LONLINE/