(2LONLINE) – Sipas Ligjit për Vetëqeverisje Lokale të Republikës së Kosovës, nëse kuvendi i komunës dështon në kryerjen e funksionit të detyrueshëm sipas standardeve të përcaktuara me ligj, apo nëse bëhet jofunksionuese dhe kështu rrezikon ushtrimin e të drejtave themelore të qytetarëve, ministria përgjegjëse për qeverisje lokale njofton komunën për dështimin dhe kërkon që të ndërmerren masa të duhura në mënyrë që të sigurohet kryerje e qetë e funksionit komunal.
Kaluan afër 45 ditë pas mbajtjes së zgjedhjeve lokale dhe fitores së LDK-së në Gjilan, por asnjë levizje nuk ka sa i përket krijimit të trupave të Kuvendit Komunal, zgjedhjen e kryesuesit të Kuvendit Komunal dhe zgjedhjen e drejtorëve komunal.
Sipas Ligjit për Vetëqeverisje Lokale, neni 50.2 Kuvendi i Komunës konsiderohet jo funksionues nëse nuk e zgjedh kryesuesin, tridhjetë (30) ditë pas themelimit.
Ndërsa Kuvendi Komunal në Gjilan është themeluar më 24 dhjetor 2013, andaj seanca e pare e punës së Kuvendit për zgjedhjen e kryesuesit të Kuvendit në Gjilan duhet të bëhet më së largu deri më 23 janar të këtij muaji.
Po ashtu sipas këtij ligji është e definuar shumë qartë se të gjithë anëtarët e kuvendit të komunës duhet të njoftohen paraprakisht me shkrim, ashtu siç kërkohet, shtatë (7) ditë pune para mbajtjes së mbledhjes.
Pra. nëse seanca e Kuvendit Komunal në Gjilan nuk thirret deri më 14 janar, deri të marten, atëhere sipas ligjit Kuvendi Komunal shpallet i dështuar në funksionimin e saj dhe merren masa ligjore për tejkalimin e kësaj gjendje, si dhe Gjilani mund të shkoj në zgjedhje të reja për Kuvendin e Komunës.
Kryetari i Komunës z.Haziri duhet të respektoj ligjin për Vetëqeverisje Lokale lidhur me funksionimin e Kuvendit Komunal si dhe të krijojë në kohën optimale organet tjera qeverisëse të Komunës sepse nuk ka asnjë arsye për të humbur kohë në kryerjen e punëve dhe shërbimeve të cilat qytetarët e Gjilanit i presin nga komuna e tyre.
Edhe pse të vetëdijshëm se kryetari i Gjilanit nuk e ka të lehtë të formojë ekipin qeverisës, sepse problemet e brendshme eventuale brenda subjektit të tij mund të jenë arsye për këto vonesa të panevojshme, por interesi i komunës dhe qytetarëve të Gjilanit është më i madhë se sa i një grupi të caktuar politik.
Ka shumë probleme me të cilat qytetarët e Gjilanit përballen në mungesë të vendimeve të cilat duhet të merren nga institucioni i Kuvendit Komunal, Kryetari i Komunës dhe nga institucionet tjera të komunës.
Riad Rashiti, anëtar i Kuvendit Komunal