Kuvendi komunal i Vitisë ndau 100 mijë euro për luftimin e pandemisë

Kuvendi komunal i Vitisë, ka mbajtur sot një mbledhje urgjente në të cilën pos që është dhënë një njoftim rreth situatës momentale të pandemisë së COVID-19 në komunën e Vitisë, po ashtu është miratuar edhe propozimi për ndarjen e mjeteve financiare për këtë destinacion.

Fillimisht kryesuesi i Kuvendit Komunal Naim Pira, ka falenderuar gjitha Institucionet komunale, shëndetsore, të sigurisë, organizatat dhe shoqatat, donatorët e vullnetarët e ndryshëm, si dhe gjithë ata që po angazhohen që kjo pandemi të tejkalohet me sa më pak pasoja.

Ndërsa zv.kryetari i komunës Hasan Aliu, njoftoi këshilltarët me punën që është bërë për gjatë këtyre ditëve të Institucioneve komunale, ku është formuar edhe Komiteti komunal i emergjencës.

“Ne si komitet, kemi qenë të angazhuar që situatën ta kemi nën kontroll. Me marrjen e masave adekuate, që nga paraqitja e rastit të parë me këtë virus, jemi mobolizuar dhe kemi marrë vendimin e menjëhershëm që Stublla të karantinohet. Kemi arritë që të menaxhojm suksesshëm me situatën dhe për momentin kemi gjendje stabile, duke mos pasur raste të reja, përpos atyre 7 rasteve në fshatin Stubëll”, ka thënë Aliu.

Propozim vendimin për ndarjen e mjeteve prej 100.000 euro, që kanë të bëjnë me luftimin e pandemisë në komunën e Vitisë, këshilltarët komunal e miratuan njëzëri.

Seanca e sotme u mbajt në kushte të jashtëzakonshme, për shkak të respektimin të masave mbrojtëse dhe ruajtjes së distancës, për çka mbledhja u mbajt në Shkollën e Mesme Profesionale “Jonuz Zejnullahu” në Viti.

Fillimisht, në hyrje të seancës, ekipi mjeksor i QKMF-së i ka bërë një kontrollë gjithë këshilltarëve dhe pjesmarrësve.