Kuvendi Komunal i Vitisë miraton disa vendime të rëndësishme në mbledhjen e katërt

Kuvendi Komunal i Vitisë ka mbajtur sot mbledhjen e katërt të rregullt, ku u shqyrtuan dhe u miratuan një sërë pikash me rëndësi për zhvillimin lokal dhe interesin e qytetarëve.

Një ndër çështjet kryesore të trajtuara ishte propozimi për miratimin e listës së veçantë të pronave të paluajtshme komunale, të cilat pritet të jepen në shfrytëzim gjatë vitit 2026. Në këtë kuadër, u miratua edhe formimi i komisionit përgjegjës për shqyrtimin e procedurave dhe vlerësimin e ofertave për dhënien në shfrytëzim të këtyre pronave.

Në rend dite ishte edhe marrëveshja e bashkëpunimit ndërmjet Komunës së Vitisë dhe organizatës “Saint Julien en Genevois” nga Franca, e cila synon thellimin e bashkëpunimit ndërkombëtar dhe shkëmbimin e përvojave.

Gjatë mbledhjes, kuvendarët diskutuan edhe një propozim-vendim për ndryshimin e destinimit të një parcele në pronësi juridike të një shkolle në Sllatinë, me qëllim ndërtimin e një çerdheje të re – projekt i rëndësishëm për komunitetin lokal.

Po ashtu, u shqyrtua edhe një deklaratë mbështetëse për eliminimin e të gjitha formave të dhunës ndaj grave në politikë dhe në jetën publike, duke reflektuar angazhimin institucional për barazi dhe përfshirje.

Mbledhja u përmbyll me pikën e zakonshme të pyetjeve dhe përgjigjeve, ku këshilltarët komunalë adresuan çështje të ndryshme në interes të qytetarëve. /2LONLINE/