Kuvendi Komunal i Kamenicës miraton Kornizën Afatmesme Buxhetore dhe një sërë vendimesh të tjera

Kuvendi Komunal i Kamenicës ka mbajtur mbledhjen e gjashtë të rregullt, në të cilën ka shqyrtuar dhe miratuar me shumicë votash të gjitha pikat e parapara në rendin e ditës.

Mbledhjen e hapi kryesuesja e Kuvendit Komunal, Arbnore Beqiraj-Fera, ndërsa të pranishëm ishin edhe kryetari i Komunës, Kadri Rahimaj, anëtarët e Kuvendit, drejtorët komunalë, përfaqësues të organizatave joqeveritare dhe pjesëmarrës të tjerë.

Në fillim të seancës u miratua procesverbali i mbledhjes së kaluar, ndërsa më pas u zhvillua seanca e pyetjeve të legjislativit drejtuar ekzekutivit.

Asambleistët shqyrtuan dhe miratuan Kornizën Afatmesme Buxhetore (KAB) të Komunës së Kamenicës, si dhe emëruan komisionet për udhëheqjen, koordinimin dhe shqyrtimin e ankesave në procesin e zgjedhjes së Këshillave Lokale.

Në mesin e vendimeve të miratuara ishte edhe Draft-Rregullorja për Taksa, Tarifa, Ngarkesa dhe Gjoba Komunale, Pilot-Projekti për Menaxhimin e Parkingut Publik, si dhe Plani Ndërkomunal për Menaxhimin e Integruar të Mbeturinave për Zonën e Menaxhimit (ZMM-5) – Rajoni i Gjilanit dhe Ferizajt për periudhën 2026–2030.

Kuvendi miratoi gjithashtu vendimin për caktimin e tarifave dhe mënyrës së inkasimit të mjeteve financiare për menaxhimin e mbeturinave, ndryshimet dhe plotësimet e disa vendimeve të mëhershme, përfshirë ato që kanë të bëjnë me shpalljen e interesit të përgjithshëm publik dhe formimin e Komisionit të Ankesave.

Po ashtu, u aprovuan vendimet për dhënien në shfrytëzim të pronës komunale përmes ankandit publik dhe për formimin e komisionit që do të zbatojë procedurat dhe do të bëjë vlerësimin e ofertave për dhënien në shfrytëzim të pronës së paluajtshme të komunës.

Pas prezantimit të rendit të ditës nga kryesuesja Arbnore Beqiraj-Fera dhe debatit të zhvilluar nga anëtarët e Kuvendit, të gjitha pikat e rendit të ditës u miratuan me shumicë votash. /2LONLINE/