Kuvendi Komunal i Kamenicës mban mbledhjen e tretë, miratohen disa vendime me shumicë votash

Kuvendi Komunal i Kamenicës ka mbajtur mbledhjen e tretë të rregullt, në të cilën u shqyrtuan dhe u miratuan një sërë pikash në lidhje me funksionimin institucional dhe zhvillimin lokal.

Mbledhjen e hapi kryesuesja e Kuvendit, Arbnore Beqiraj-Fera, ndërsa të pranishëm ishin asambleistët, drejtorë komunalë, përfaqësues të organizatave joqeveritare dhe palë të tjera të interesuara.

Në fillim të seancës, kryesuesja propozoi dy pika shtesë për rendin e ditës, të cilat u miratuan nga asambleistët, ndërsa pika që kishte të bënte me rifreskimin e listës rezervë për emërtimin e rrugëve, rrugicave dhe hapësirave publike u shty për mbledhjen e ardhshme.

Gjatë mbledhjes, anëtarët e rinj të Kuvendit Komunal, Hasan Krasniqi, Valmir Ramadani dhe Leonita Mavriqi, bënë betimin, ndërsa u miratua edhe procesverbali nga mbledhja e kaluar.

Në mesin e çështjeve të trajtuara ishin raporti financiar buxhetor për periudhën 1 janar – 31 dhjetor 2025, si dhe raporti për zbatimin e rekomandimeve nga Zyra Kombëtare e Auditimit. Po ashtu, u diskutua kërkesa e Ministrisë së Administrimit të Pushtetit Lokal për rishqyrtimin e vendimit për Planin Zhvillimor Komunal 2025-2033.

Asambleistët miratuan edhe disa vendime të tjera, përfshirë shpalljen e interesit të përgjithshëm publik për çështje të caktuara, formimin e Komisionit për ndryshimin e stemës së komunës, themelimin e Këshillit Komunal për Siguri në Bashkësi (KKSB), si dhe emërtimin e palestrës së sportit.

Gjithashtu, u miratuan raportet për vlerësimin e dëmeve nga fatkeqësitë natyrore dhe u vendos për ndryshimin dhe plotësimin e vendimit për komisionin që shqyrton ndarjen e titujve të nderit dhe mirënjohjeve. Një tjetër vendim i rëndësishëm ishte edhe formimi i Komisionit Komunal të Aksionarëve për Ndërmarrjen Publike Lokale “Dardana” Sh.A.

Të gjitha pikat e rendit të ditës, përfshirë edhe ato të shtuara, u miratuan me shumicë votash nga anëtarët e Kuvendit.  /2LONLINE/