Kuvendi Komunal i Kamenicës mban mbledhjen e pestë, miratohen të gjitha pikat e rendit të ditës

Kuvendi Komunal i Kamenicës ka mbajtur mbledhjen e pestë të rregullt, në të cilën janë shqyrtuar dhe miratuar me shumicë votash të gjitha pikat e rendit të ditës, përfshirë edhe dy propozime shtesë të paraqitura nga ekzekutivi komunal.

Mbledhjen e hapi kryesuesja e Kuvendit Komunal, Arbnore Beqiraj-Fera, ndërsa të pranishëm ishin kryetari i Komunës, Kadri Rahimaj, nënkryetarja Arta Bajralija, asambleistë, drejtorë komunalë, përfaqësues të OJQ-ve dhe qytetarë të tjerë.

Në fillim të seancës, kryesuesja Beqiraj-Fera prezantoi rendin e ditës dhe kërkoi nga asambleistët propozime eventuale për pika shtesë. Me këtë rast, kryetari Rahimaj propozoi dy pika të reja për shqyrtim: bartjen e mjeteve nga të hyrat vetanake të vitit 2025 në vitin 2026 dhe buxhetimin e bashkëfinancimit për projektin “Kolektori i ujërave atmosferikë”, projekt ky në bashkëpunim me kompaninë “M&B Company” SH.P.K.

Gjatë mbledhjes u diskutua për disa çështje me rëndësi për komunën, përfshirë formimin e komisioneve për dhënien në shfrytëzim të pronës së paluajtshme komunale, miratimin e raporteve për vlerësimin e dëmeve nga fatkeqësitë natyrore, si dhe Draft-planin Komunal për Ri-integrimin e Qëndrueshëm të Personave të Riatdhesuar dhe Integrimin e të huajve në Komunën e Kamenicës për periudhën 2026-2028.

Pas debateve nga asambleistët, të gjitha pikat e rendit të ditës u miratuan me shumicë votash. /2LONLINE/