Kuvendi Komunal i Kamenicës mban mbledhjen e katërt të rregullt, miratohen të gjitha pikat e rendit të ditës
Kuvendi Komunal i Kamenicës ka mbajtur mbledhjen e katërt të rregullt, në të cilën u shqyrtuan dhe u miratuan një sërë çështjesh me rëndësi për funksionimin e komunës. Mbledhjen e hapi kryesuesja e Kuvendit, Arbnore Beqiraj-Fera, ndërsa të pranishëm ishin kryetari i komunës Kadri Rahimaj, nënkryetarja Arta Bajralija, asambleistët, drejtorët komunalë, përfaqësues të organizatave joqeveritare dhe palë të tjera të interesuara.
Në fillim të seancës, kryesuesja paraqiti rendin e ditës dhe ftoi të pranishmit për propozime shtesë. Kryetari Rahimaj propozoi tri pika të reja për shqyrtim, të cilat u përfshinë në rendin e ditës.
Ndër pikat kryesore të trajtuara ishin miratimi i procesverbalit nga mbledhja e kaluar, pyetjet e legjislativit drejtuar ekzekutivit, si dhe shqyrtimi i Raportit Financiar Buxhetor për periudhën janar–mars 2026. Gjithashtu, Kuvendi shqyrtoi dhe miratoi disa propozim-vendime me rëndësi, përfshirë ndarjen e mjeteve financiare për punëtorët e NPL “Dardana” SH.A., dhënien në shfrytëzim të një prone komunale për Policinë e Republikës së Kosovës, si dhe rregulloren për organizimin e brendshëm dhe sistematizimin e vendeve të punës në komunë.
Në këtë mbledhje u diskutua edhe formimi i Komisionit Komunal të Aksionarëve për PPP “Ecohigjena”, falja e borxheve të papaguara për shfrytëzimin e hapësirave publike, si dhe emërtimi i sheshit “Metush Krasniqi”. Po ashtu, u miratua plotësimi i listës rezervë për emërtimin e rrugëve dhe shesheve në territorin e komunës.
Nga pikat shtesë të propozuara, Kuvendi miratoi rekomandimin për ndarjen e çmimit “Emblema e Kamenicës” për zonjën Faruza Kallaba, bashkëfinancimin e një projekti me komunitetin e fshatit Karaçevë e Epërme për rehabilitimin e hapësirës së varrezave, si dhe Draftin e Punës të Këshillit Komunal për Siguri në Bashkësi për vitin 2026.
Të gjitha pikat e rendit të ditës, përfshirë edhe ato shtesë, u shqyrtuan dhe u miratuan me shumicë votash nga anëtarët e Kuvendit. /2LONLINE/