Kuvendi Komunal i Kamenicës mban dëgjim buxhetor për Draft-Buxhetin e vitit 2027

Kuvendi Komunal i Kamenicës ka mbajtur dëgjim buxhetor me qëllim të prezantimit dhe diskutimit të Draft-Buxhetit të Komunës së Kamenicës për vitin 2027, si dhe parashikimeve buxhetore për periudhën 2027–2029.

Dëgjimin e hapi Kryesuesja e Kuvendit Komunal, Arbnore Beqiraj-Fera, ndërsa të pranishëm ishin Drejtoresha e Financave dhe Buxhetit, Arditë Dërmaku, Drejtori i Investimeve Kapitale, Blerim Morina, zyrtari Selami Zylfiu nga kjo drejtori, zyrtarë komunalë dhe qytetarë të pranishëm.

Në fjalën e saj Kryesuesja Beqiraj-Fera theksoi rëndësinë e këtij dëgjimi, duke bërë të ditur se ky është dëgjimi i fundit publik për Draft-Buxhetin para shqyrtimit dhe miratimit të tij në seancën e Kuvendit Komunal.

“Ky dëgjim buxhetor është një nga hapat e fundit para shqyrtimit dhe miratimit të Draft-Buxhetit për vitin 2027 në Kuvendin Komunal. Përmes këtyre dëgjimeve kemi synuar që qytetarët të kenë mundësinë të shprehin kërkesat dhe prioritetet e tyre, të cilat duhet të jenë pjesë e planifikimit dhe zhvillimit të Komunës sonë. Falënderoj të gjithë qytetarët që kanë marrë pjesë dhe kanë kontribuar me propozimet e tyre gjatë këtij procesi”, ka thënë ajo.

Më pas Drejtoresha e Financave dhe Buxhetit, Arditë Dërmaku, prezantoi në pika të shkurtra Draft-Buxhetin e Komunës së Kamenicës për vitin 2027.

Ajo tha se procesi i hartimit të buxhetit është zhvilluar përmes disa fazave të konsultimit dhe dëgjimeve me qytetarë.

“Ne fillimisht kemi pranuar dy qarkore buxhetore nga Ministria e Financave. Më pas kemi mbajtur dëgjimet buxhetore, 24 dëgjime gjithsej, pothuajse në të gjitha lokalitetet. Në këto dëgjime kemi pranuar kërkesat e qytetarëve, të cilat jemi munduar t’i inkorporojmë në buxhetin për vitin 2027. Buxheti për vitin 2027 do të jetë 15 milionë e 329 mijë e 208 euro”, ka thënë ajo.

Pas prezantimit, të pranishmëve iu dha mundësia për të parashtruar pyetje, sugjerime dhe kërkesa lidhur me Draft-Buxhetin. Meqenëse nuk pati pyetje apo diskutime të tjera dëgjimi buxhetor u përmbyll.   /2LONLINE/