Kuvendi Komunal i ka dhënë mbështetje DKA-së për të mos pranuar anulimin e testit të arritshmërisë

/2L ONLINE/ – Valentina Bunjaku-Rexhepi, kryesuese e Kuvendit Komunal në Gjilan, ka folur sot për mbështetjen që Kuvendi Komunal i dha Drejtorisë së Arsimit për të mos pranuar anulimin e testit të arritshmërisë nga MASHT-i, sepse vendimi nuk bazohet në fakte. Kuvendi Komunal nuk do të vazhdojë punën dhe as nuk do të mbajë seanca, derisa MASHT-i nuk e anulon këtë vendim.

“Ne nuk do ta pranojmë këtë vendim në asnjë mënyrë, sepse kemi informata se nuk ka pasur asnjë vrejtje nga mbikëqyrësit e këtij procesi”, ka thënë Bunjaku-Rexhepi.

Suksesi që kanë treguar nxënësit e Gjilanit në testin e arritshmërisë nuk duhet ta befasojë askënd, derisa dihet se edhe vitin e kaluar kanë qenë ndër më të mirët dhe ata shquhen për rezultate në garat e ndryshme.

Ajo ka kërkuar nga MASHT-i që të formojë një komision dhe në bashkëpunim me DKA-në të rivlerësojë këtë vendim të ngutshëm, duke nënvizuar se kërkesa është përkrahur edhe nga opozita. /2L ONLINE/