Kuvendi Komunal e largon nga rendi i ditës propozim-vendimin për deponinë e mbeturinave inerte në Malishevë

Riad Rashiti nga Partia Demorkatike e Kosovës (PDK), ka bërë me dije se pas reagimit të tij publik, Kuvendi Komunal i Gjilanit e largoi (e tërhoqi) nga rendi i ditës propozim-vendimin për deponinë e mbeturinave inerte në fshatin Malishevë.

Rashiti thotë se as në seancën tjetër të KK nuk do të duhet miratuar këtë vendim skandaloz, sepse as banorët e Malishevës nuk do të lejojnë hapjen e kësaj deponie në atë vend që është propozuar.

“Komuna e Gjilanit e ka obligim dhe detyrim ligjor që për këso vendime të mbajë debate publike me qytetarët dhe pa pëlqimin e tyre nuk mund të vendos dhunshëm sikurse për këtë projekt tejet të dëmshëm për banorët”, ka thënë Rashiti.

Ai tha se i falënderon të gjithë anëtarët e Kuvendit Komunal dhe përfaqësuesit e subjekteve politike, që me 31 vota e tërhoqën nga rendi i punës këtë propozim-vendim të papranueshëm që erdhi nga kryetari i komunës së Gjilanit.  /2LONLINE/