Kuvendari Fadil Ademi mblodhi mbeturinat te Kalaja e Pogragjës nga ku përçoi porosinë ta ruajmë ambientin të pastër!

Fadil Ademi, anëtar i Kuvendit Komunal të Gjilanit nga radhët e Lëvizjes Vetëvendosje, njihet si njëri prej anëtarëve të Kuvendit që ka nisma apo i bashkohet nismave të ndryshme në terren qoftë për ruajte të ambientit, qoftë për evidentim të ndonjë shqetësimi që kanë qytetarët, për ta adresuar atë shqetësim në adresën e duhur.

Dhe, siç ka bërë të ditur vetë Ademi, sot te Kalaja e Pogragjës, ka grumbulluar mbeturinat për ta pastruar ambientin, nga ku ka përçuar mesazhin që ta duam, ta ruajmë dhe ta respektojmë natyrën, sepse është pasuria jonë e përbashkët.

“Sot pasdite te Kalaja e Pogragjës, bëra një veprim të vogël për ta ruajtur këtë natyrë të bukur. Mblodha mbeturinat që ishin lënë aty, me shpresën që ky gjest të na kujtojë të gjithëve sa e rëndësishme është të kujdesemi për vendin tonë”, ka thënë Ademi.

Ai ka kërkuar nga të gjithë që ta japin kontributin e tyre, sado të vogël, sepse vetëm kështu mund ta mbajmë të pastër dhe ta ruajmë bukurinë e vendit tonë.

“Uroj që pamje të tilla të mos i shohim më. Ta duam, ta ruajmë dhe ta respektojmë natyrën, sepse është pasuria jonë e përbashkët”, ka thënë asambleisti i Kuvendit komunal të Gjilanit, Fadil Ademi. /2LONLINE/