Kushtrim Kadriu kërkon të sigurohen kushtet e nevojshme të ngrohjes për shkollën fillore “Rexhep Elmazi”
“Prej disa ditësh kam pranuar ankesa nga prindërit lidhur me kushtet e ngrohjes në shkollën fillore “Rexhep Elmazi”, në lagjen time, Dheu i Bardhë, në Gjilan. Shqetësimet e prindërve janë të arsyeshme, pasi sigurimi i kushteve të përshtatshme për zhvillimin e procesit mësimor, veçanërisht gjatë ditëve të ftohta, është një domosdoshmëri për shëndetin dhe mirëqenien e nxënësve:, ka thënë Kushtrim Kadriu, anëtar i Kuvnedit Komunal të Gjilanit nga radhët e lëvizjes Qytetare “Vatra”.
Ai ka bërë me dije se sot ka kontaktuar edhe drejtorin e Arsimit, të cilit ia ka përcjellë shqetësimet dhe gjendjen e raportuar nga prindërit, duke kërkuar që kjo çështje të trajtohet me prioritet dhe të ndërmerren masat e nevojshme për zgjidhjen e saj.
“Nga drejtori mora premtimin se kjo çështje do të zgjidhet brenda pak ditësh dhe se do të sigurohen kushtet e nevojshme të ngrohjes për nxënësit dhe mësimdhënësit”, ka thënë Kushtrim Kadriu i Vatrës.