Kushtrim Kadriu kërkon nga Shoqata e të Burgosurve Politikë nisjen e procedurës për njohjen e ish-krerëve të UÇK-së si të burgosur politikë!

Kushtrim Kadriu, që është njëri prej familjarëve të një ish-të burgosuri politik, Nijazi Kadriut, i ka adresuar një shkresë kreut të Shoqatës së të Burgosurve Politik me kërkesën për inicimin e procedurës për njohjen e ish-krerëve të UÇK-së si të burgosur politikë

Ja shkresa e plotë:

I nderuar Kryetar i Shoqatës së të Burgosurve Politikë, z.Shefik Sadiku

Lënda: Kërkesë për inicimin e procedurës për njohjen e ish-krerëve të UÇK-së si të burgosur politikë

Unë, Kushtrim Kadriu, familjar i një ish-të burgosuri politik, ju drejtohem me kërkesën që Shoqata të shqyrtojë mundësinë e inicimit të procedurës për njohjen e z. Hashim Thaçi, z. Kadri Veseli, z. Rexhep Selimi si të burgosur politikë.

Kjo kërkesë mbështetet në bindjen se procesi gjyqësor ndaj ish-krerëve të Ushtrisë Çlirimtare të Kosovës është i motivuar politikisht dhe se mënyra e zhvillimit të tij ka ngritur shqetësime të shumta lidhur me drejtësinë dhe paanshmërinë e Gjykatës Speciale.

Duke pasur parasysh se kontributi i tyre lidhet drejtpërdrejt me luftën çlirimtare dhe krijimin e Republikës së Kosovës, ju kërkoj që këtë çështje ta trajtoni me seriozitet dhe të ndërmerrni hapat institucionalë që janë në kompetencën e Shoqatës.

Me respekt,
Kushtrim Nijazi Kadriu
Familjar i një ish-të burgosuri politik