Kurti, Maqedonci dhe Jashari vizitojnë pjesëtarët e FSK-së në ushtrimin “Defender Europe 25”

Kryeministri në detyrë i Republikës së Kosovës, Albin Kurti, Ministri i Mbrojtjes në detyrë Ejup Maqedonci, së bashku me Komandantin e Forcës së Sigurisë së Kosovës, Gjenerallejtënant Bashkim Jashari, vizituan aktivitetet e ushtrimit shumëkombësh “Defender Europe 25” (DE/IR25), përkatësisht Post-Komandën Taktike të Divizionit të 28-të të Ushtrisë Amerikane, Kontrollën e Lartë të Ushtrimit dhe Kampin Taktik në poligonin trajnues në Devë.

Gjatë vizitës, ata u njohën nga afër me rolin kyç dhe kontributin e Forcës së Sigurisë së Kosovës në kuadër të ushtrimit DE/IR25 si nikoqir, duke theksuar bashkëpunimin e ngushtë dhe të frytshëm me Divizionin e 28-të të Ushtrisë Amerikane, i cili luan një rol strategjik në promovimin e sigurisë dhe stabilitetit në rajon.

Po ashtu, u theksua rëndësia e bashkëpunimit me partnerët dhe aleatët ndërkombëtarë, duke përfshirë forcat nga vende të NATO-s dhe partnerë të tjerë strategjikë, që kontribuojnë në forcimin e kapaciteteve operacionale të FSK-së dhe ngritjen e gatishmërisë së përgjithshme të forcave tona.

Në përmbyllje të vizitës ata përgëzuan pjesëtarët e FSK-së dhe ata aleatë për përkushtimin, profesionalizmin dhe bashkëpunimin e shkëlqyer gjatë këtij ushtrimi shumëkombësh. Ata vlerësuan se UF DE/IR25, si një nga ushtrimet më të mëdha që realizohet në kontinentin europian, është një mundësi e jashtëzakonshme për avancimin e kapaciteteve mbrojtëse të FSK dhe përforcimin e aleancave strategjike ndërkombëtare, njofton FSK.  /2LONLINE/