Kurti: Asnjëra prej ofertave që ne i kemi bërë nuk u pranua nga kreu i LDK-së

Albin Kurti, kryeministri i vendit dhe lideri i Vetëvendosja ka thënë se bisedimet rezultuan të pasuksesshme me LDK-në, pasi asnjëra prej ofertave të propozuara nuk u pranua nga kreu i LDK-së.

“Ne ofruam që Lidhja Demokratike e Kosovës, në bashkëqeverisje me Lëvizjen Vetevendosje dhe partnerët e tjerë të mazhorancës prej 66 deputetëve, ta ketë zëvendëskryeministrin, Ministrinë e Punëve të Jashtme dhe tri ministri të tjera”, ka thënë Kurti.

Sipas tij, kur u refuzua oferta e tyre për bashkëqeverisje, që LDK-ja ta ketë zëvendëskryeministrin dhe katër ministri, i bënë një ofertë tjetër.

“Propozuam rokadë në Kuvend: LDK-ja ta marrë postin e Kryetarit të Kuvendit, ndërsa Albulena Haxhiu të bëhet nënkryetare. Por as kjo nuk u pranua. Pra ishte një mundësi që të mos thuhet që të tre kandidatët vijnë nga subjekti Vetëvendosje”, ka thënë Kurti.  /2LONLINE/