Kurteshi: Komunat shqiptare në Luginë të krijojnë Asociacionin e tyre

Në seancën e Kuvendit të Kosovës deputeti i Vetëvendosjes, Ismajl Kurteshi kërkoi që shqiptarët në Luginën e Preshevës të mbështeten institucionalisht për ta formuar Asociacionin e Komunave Shqiptare në Serbi.

Ai tha se derisa Serbia po synon që Asociacionin e Komunave Serbe ta bëjë kategori kushtetuese, në anën tjetër mënyrë të hapur, po i diskriminon shqiptarët në Luginën e Preshevës. Kurteshi theksoi se shqiptarët atje përballen me presion të vazhdueshëm, ndërkohë që kërkoi nga Kosova dhe Shqipëria më shumë përkrahje për tri komunat shqiptare, Preshevë, Medvegjë dhe Bujanoc.

“Dy shtetet shqiptare duhet të hapin zyra ndërlidhëse për Luginën e Preshevës dhe të vënë kontakte të rregullta institucionale. Tri komunat e Luginës së Preshevës duhet ta themelojnë Asociacionin e Komunave dhe për këtë duhet ta kenë edhe përkrahjen tonë”, tha Kurteshi.