Kur shkelet betimi!

/E keqja më e tmerrshme është ajo që shtiret si e mirë.
Publil Sir/

(2LONLINE) – Betimi solemn i paraprin marrjes së detyrës së deputetëve të Kuvendit të Kosovës dhe zyrtarëve të lartë, ku përfshihen edhe anëtarë të Qeverisë. Në betimin e deputetëve përveç tjerash thuhet:

” Unë deputeti i Kuvendit të Republikës së Kosovës, betohem se me nder e me përkushtim do ta kryej detyrën time dhe do ta përfaqësoj me dinjitet popullin, do të punoj në interes të Kosovës dhe të gjithë qytetarëve të saj...”

Në seancën e Kuvendit të Kosovës të mbajtur me 23 prill 2014, Kryeministri i Kosovës, Hashim Thaçi, në lidhje me themelimin e Gjykatës Speciale për hetimin e krimeve eventuale të UÇK – së deklaroi:”…kërkesa e Bashkësisë Ndërkombëtare ndaj Kosovës për të themeluar një Gjykatë Speciale … për të hetuar pretendimet e dala nga raporti i Dick Martit është padrejtësia dhe fyerja më e madhe që mund t’i bëhet Shtetit të Kosovës dhe shoqërisë kosovare...”

“...Kjo është një gjë shumë e rënd që do të rëndojë në ndërgjegjen tonë derisa të jemi gjallë”

Përkundër këtyre konstatimeve Kryeministri e përfundoi fjalimin e tij kështu: “Por unë ju ftoj të nderuar deputetë që të votoni pro kësaj marrëveshje dhe themelimit të Gjykatës Speciale … .” .” A mund të merret me mend që Kryeministër të angazhohet për aprovimin e një kërkese të padrejtë dhe fyese për vendin e tij dhe të vazhdon punën si kryeministër.

Vulini, ministri i Qeverisë së Serbisë për Kosovën, me këtë rast deklaroi:” Ligji për themelimin e Gjykatës Speciale për krime të supozuara të UÇK –së asnjëherë nuk do të miratohej, po të mos ishte nënshkruar marrëveshja e Brukselit.” Deklarata e Vulinit, por jo vetëm deklarata e tij dëshmojnë për dëmet që ua kanë sjell bisedimet e Brukselit, të udhëhequr nga ky Kryeministër, vendit ton.

Deputetja Rada Trajkoviq, e njohur si kundërshtare e përbetuar e shtetit të Kosovës, e entuziazmuar me rezultatet e votimit, në fjalën e saj të shkurt pas aprovimit të këtij Ligji i falënderoi, madje dy herë deputetët që votuan pro themelimit të Gjykatës Speciale.

Se kërkesa është e paarsyeshme dhe se themelimi i Gjykatës Speciale është i dëmshëm për Kosovën e thanë të gjithë përfaqësuesit e partive politike shqiptare në Kuvendin e Kosovës. Por të njëjtit, përveç grupit parlamentar të Lëvizjes Vetëvendosje dhe nëntë deputetëve nga radhët e PDK –së, AAK –së dhe LB –së, që votuan kundër, dhe disa të tjerëve që abstenuan, e votuan vet dhe kërkuan edhe nga deputetët e tjerë ta votojnë themelimin e kësaj gjykate, me arsyetimin se kështu po e zgjidhnin të keqen më të vogël, në të kundërtën gjykatën do ta themelonte Këshilli i Sigurimit i OKB –së. Se kanë presion nga ndërkombëtarët e kështu me radhë.

Me arsyetime të ngjashme, ky soj i udhëheqësve, që nuk janë të dej t’i udhëheqin as shtëpitë e tyre e pranuan decentralizimin në baza etnike, gjashtë pikat e Ban Ki Munit, bisedimet pa kushte të Brukselit, fusnotën, amnistinë e udbashëve që bënë krime në Kosovë dhe integrimin e një pjese të tyre në strukturat e shtetit të Kosovës, buxhetin e veçantë për veriun dhe po vazhdon të ofroj benifite të tjera, që po e rrënojnë këtë vend të zënë peng nga kjo kastë e padinjitetshme që po e udhëheq vendin, me vota të vjedhura.

Cila në të vërtet është e keqja më e madhe?!

Cila në të vërtet është e keqja më e madhe? Shkelja e betimit, miratimi i kërkesës së padrejtë dhe fyese të Serbisë të adresuar përmes bashkësisë ndërkombëtare, veprim ky që rëndon madje edhe mbi ndërgjegjen e atyre që kanë problem me ndërgjegjen, apo refuzimi i kërkesës së padrejtë dhe fyese që e dëmton Kosovën?

Pse mund të jetë më i dëmshëm refuzimi i kësaj kërkese të dëmshme, të padrejtë dhe fyese. Pse do të ishte më e dëmshme madje edhe themelimi i të njëjtës gjykatë nga Këshilli i Sigurimit, e cila nëse nuk është politike, do ta kryente të njëjtën punë sikur kjo gjykatë që do të themelohet me aprovimin e Kuvendit të Kosovës?

Se po shkelet betimi i dhënë po dihet. Po ashtu dihet se kjo udhëheqje nuk po i përfaqëson dinjitetshëm qytetarët, se veprimet e tyre po e dëmtojnë rënd këtë vend.

Dihet po ashtu se në shtetet ku sundon ligji: Ata që e shkelin betimin e dhënë, ata që votojnë kundër interesave të vendit. Ata që i aprovojnë ose kërkojnë aprovimin e padrejtësisë dhe fyerjen e vendit të tyre, jo vetëm se nuk mund të jenë përfaqësues të popullit por edhe do të përgjigjen para gjyqit të tij ( të popullit). Po ashtu dihet se përkundër vështirësive që i ka, Kosova shpejt do të bëhet shtet ligjor.

/Ismajl KURTESHI/
autori është, ish deputet, aktualisht në krye të Lëvizjes Vetëvendosje ,Qendra në Gjilan.