Kujt do t’i takojë derbi SC Gjilani – FC Drita?!

Java e 26-të e Superliga e Kosovës në Futboll sjell sot derbin ndërmjet SC Gjilanit dhe FC Dritës. Të dy skuadrat do të zbresin në fushën e stadiumit ndihmës të qytetit, me bari artificial, të motivuara maksimalisht për të siguruar trepikëshin. Gjilani synon të forcojë pozitën që e dërgon në garat evropiane, ndërsa Drita kërkon të vazhdojë garën për titullin kampion, transmeton 2LONLINE.com.

Duke pasur parasysh rivalitetin e madh ndërmjet dy klubeve dhe rëndësinë e pikëve në këtë fazë të kampionatit, ndeshja pritet të jetë e luftuar deri në sekondat e fundit, me një epilog të hapur deri në vërshëllimën përfundimtare të gjyqtarit.

Aktualisht, Drita (me një lojë më pak), renditet në vendin e dytë me 45 pikë, po aq sa ka edhe lideri aktual, Ballkani, ndërsa Gjilani mban pozitën e katërt me 39 pikë.

Ndeshja ndërmjet SC Gjilanit dhe FC Dritës nis nga ora 13:00. /2LONLINE/