Kryetari Sokol Haliti mirëpriti përfaqësueset dhe balerinat e Studios “Harmony” në Viti
Kryetari i Komunës së Vitisë, Sokol Haliti, ka pritur sot në takim përfaqësueset dhe balerinat e Studios së Baletit dhe Muzikës “Harmony”, e cila ka filluar veprimtarinë e saj edhe në komunën e Vitisë.
Në takim ishin të pranishme Rudina Sojeva, themeluese e studios dhe mësuese e baletit, si dhe Lendita Ahmeti, profesoreshë e pianos dhe këndimit, së bashku me balerinat e studios.
Gjatë takimit, kryetari Haliti u njoftua nga afër me punën, programet dhe synimet e “Harmony”, e cila u ofron fëmijëve dhe të rinjve mundësi për të zhvilluar talentin dhe aftësitë e tyre artistike në balet, piano, këndim dhe këndim koral.
Kryetari Haliti i përgëzoi për iniciativën dhe angazhimin e tyre, duke vlerësuar rëndësinë e krijimit të mundësive të reja për edukimin dhe zhvillimin artistik të fëmijëve dhe të rinjve.
Ai u dëshiroi shumë suksese në veprimtarinë e tyre në Viti, duke theksuar se iniciativa të tilla pasurojnë jetën kulturore dhe artistike të komunës dhe krijojnë hapësira të reja për afirmimin e talenteve të rinj. /2LONLINE/